Германскиот одгледувач на свињи, Андреј Бабиц решил да започне со одгледување на нешто поразлично, односно решил да одгледува т.н. влакнести свињи, кои во научниот свет и меѓу познавачите уште се нарекуваат и унгарски мангулици.
„Јас сум сликар по професија, но отсекогаш сум сакал да работам земјоделство. Пред пет години, мојата сопруга и јас превзедовме една напуштена фарма од мојот дедо во близина на градот Гисен и ја адаптиравме за екстензивно одгледување на свињи“, вели Бабиц.
Се одлучиле за одгледување на малку поспецифична и не многу позната раса на свињи, а нивна главна цел била да ја зачуваат оваа раса од истребување. Инаку, таа веќе е на списокот на загрозени животни, а на одгледувачот му било тешко да пронајде барем неколку единки кои ќе ги одгледува, пишува top agrar.
Раса, отпорна на болести
Унгарската мангулица е свиња со средна големина, релативно ниска и широка, што особено доаѓа до израз кај поголемите свињи, многу е отпорна на болести и има одлична способност за прилагодување на скромните услови за одгледување и хранење. Главата и е средно долга, а профилната линија на носниот дел од черепот е малку конкавна. Вратот и е средно долг и мускулест, како и грбот, кој е малку заоблен и не премногу тесен.
Маториците во просек се високи околу 70 – 80 сантиметри. Градите им се кружни и длабоки. Нозете им се правилни, но со малку помек скелет. Но иако скелетот е пофин, коските се многу тешки.
Тежината на маториците се движи од 120 до 180 кг, а на крмаците од 180-200 кг. Но, разликите во тежината исто така постојат во зависност од видот, при што белите и црвените типови се малку поголеми во однос на тежината, додека влакнестиот вид е помал и таквите маторици тежат од 100 до 150 кг.
Цената на шунката достигнува дури и до 90 евра за килограм
Унгарија сè уште е најголемиот производител на мангулици во светот, но нивната популарност во кулинарството брзо се шири и во другите европски земји, како и во САД.
„Иако имавме дури 80 од нив до минатата година, по големата штета предизвикана од сушата, која ни ги намали приносите од жито, нè натера нивниот број да го преполовиме“, посочува Андреј и додава дека бирократијата му создава најголеми проблеми. За да обезбеди дзвола за одгледување му биле потребни три години.
Но, тие воопшто не жалат и како што тврдат сопружниците, бизнисот им цвета. “Маснотијата на овие свињи воопшто не може да се спореди со другите свињи. Таа е вистински носител на вкусот. Ги продаваме сите делови од месото. Чадената сланина секогаш е распродадена уште пред да излезе на пазарот, а цената на шунка се движи помеѓу 60 и 90 евра за килограм“, вели овој одгледувач. Тие продажбата ја вршат преку телефон, затоа што нивната веб-страница сè уште е во изработка.
Андреј признава дека имаат за цел да го прошират имотот. „Сега само ќе работиме и ќе се трудиме затоа што е премногу забавно за да се откажеме“, заклучува Бабиц.
Извор: Агроклуб
