На месноста „Кумлак“, Штипско, во сабота ќе се пошумува, ќе се засадат 4.000 садници црн бор, најави на вчерашната прес-конференција градоначалникот на Општина Штип, Иван Јорданов. Посочи дека вработените во администрацијата, општина и јавните претпријатија заеднички ќе придонесуваат за зелена околина, чиста животна средина и подигање на свеста кај граѓаните за раззеленување на околината.
Тој најави дека започнуваат и неделните акции за расчистување на сите населени места во Општина Штип.
– Грижата за здрава животна средина оваа пролет ќе биде една од приоритетите во Општина Штип. За таа цел на ден 11.03.2023, сабота Општина Штип заедно со јавните претпријатија ќе спроведе голема акција за пошумување. Вработените во општината и јавните претпријатија, целата администрација оваа сабота ќе засадат неколку илјади садници црн бор на месноста „Кумлак“ со што ќе ги зголемиме зелените површини, позитивно ќе придонесеме за почист воздух и подигање на јавната свест за зачувување на животната средина преку пошумување и раззеленување на околината, вели Јорданов.
Во оваа акција планирано е да се засадат 4.000 садници црн бор, а дополнително ќе се засадат садници покрај коритото на река Отиња и на други останати локации во градот. Садниците се донација од општествено одговорни компании, бидејќи расадникот на ЈП „Исар“не располага со доволен број на садници.
Напишете коментар