Последниве неколку години ЕУ своите земјоделски политики ги насочи кон „подмладување на секторот“ односно мотивирање на младите да се вклучат во земјоделското производство. Според достапните податоци, земјоделци помлади од 40 години се сопственици на само 11% од сите фарми во Европската Унија. Мотивирањето на повеќе млади луѓе да почнат да се занимаваат со земјоделство е поприличен предизвик. Помошта за започнување бизнис за млади земјоделци се обезбедува преку неповратни средства за новонастанати претпријатија, поддршка на приходите и можности како на пример дополнително оспособување.
Со давање поддршка за следната генерација европски земјоделци се зголемува идната конкурентност на земјоделството на ЕУ, а тоа придонесува за безбедноста на снабдувањето со храна во Европа во наредните години.
Во 2020 година најголем процент од земјоделци сопственици на фарми биле мажи постари од 65 години, што подетално може да се види во табелите погоре.
Податоците од 2016 година, кои се абдејтувани во февруари 2021 година го покажуваат процентот на фармери по возраст во земјите членки на ЕУ.
Поддршка која им се нуди на младите земјоделци
Со мерките за поддршка на приходите, ЕУ на младите земјоделци им обезбедува дополнителна помош, при што националните власти мора:
-да издвојат до 2% од нивните вкупни средства наменети за поддршка на приходите за млади земјоделци,
-да одлучат за колку хектари по стопанство ќе биде доделена поддршка во рамките на исплатата за млади земјоделци (максимум 90 хектари)
да се избере метод за пресметување на исплатата за млади земјоделци (до 50% од исплатата за поддршка на приходите на земјоделците)
-да одлучи дали корисниците на програмата за плаќања за млади земјоделци треба да имаат соодветни вештини и/или да исполнат одредени барања за оспособување
-откако прифатливите корисници ќе го започнат работењето, да се доделуваат неповратни исплати на младите земјоделци во период од пет години
-на младите земјоделци да им се даде приоритет при доделувањето на основните права за плаќање од националните/регионалните резерви. Во земјите членки на ЕУ кои спроведуваат основна програма за плаќање, оваа предност е важна за младите земјоделци кои немаат право на исплата, кои имаат помали права за исплата од хектар земјоделско земјиште или кои имаат права за исплата со мала вредност.
Фондови за поддршка на руралниот развој
Покрај тоа, во рамки на програмите за рурален развој често се обезбедуваат дополнителни мерки за помош на младите земјоделци да започнат бизнис. Поддршката може да биде во форма на бесповратни средства, заеми или гаранции осмислени да го поттикнат развојот на руралните претпријатија или совети за тоа како е најдобро да се започне.
Тие мерки за рурален развој се поддржани и од иницијативата за млади земјоделци. Тие ја обединуваат поддршката достапна во рамките на Европскиот земјоделски фонд за рурален развој (EPFRR) и експертизата на Европската инвестициска банка. Вкупниот износ на поддршката е една милијарда евра. Со заемите ќе управуваат локални банки и лизинг компании кои работат низ ЕУ. Најмалку 10% од износот позајмен на банките кои учествуваат ќе биде наменет за земјоделците под 41-годишна возраст, кои ќе добијат конкурентни услови за финансирање.
Европската Унија, преку различни мерки од Програмата за рурален развој се стреми да ја подобри положбата на младите земјоделци и да го олесни започнувањето и одржувањето на бизнисот.
Ангажирањето на младите луѓе во земјоделството има позитивно влијание на различни области:
-се развиваат руралните средини
-се поттикнува престојот и враќањето на младите во руралните средини
-се поттикнува вработувањето на младите
-се поттикнува развојот и модернизацијата на земјоделскиот сектор
-се поттикнуваат иновации во земјоделскиот сектор.
Младите земјоделци можат да придонесат за развојот на земјоделството поради нивните специфични карактеристики:
-тие полесно ги прифаќаат новите технологии и знаења – повеќе се во чекор со најновите трендови во технологијата
-почесто се одлучуваат да одгледуваат нетипични и профитабилни земјоделски култури
-поактивно учествуваат во донесувањето и креирањето на различни одлуки и сл.
-тие се повеќе свесни за важноста на одржливоста на животната средина.
