Компанијата Деспина Комерц 95 од Росоман, ја започнува новата кампања за откуп на млад кромид од земјоделците, долгогодишни кооперанти на компанијата. Веќе традиционално од први април почнуваат со откупот во неограничени количини кои ги пласираат на европските пазари на големо и во супермаркетите.
– Росоман моментално е единствениот регион во Македонија и лидер за производство на млад кромид кој што е доста застапен особено последните 5 години, поради стабилен пласман и добра цена. Земјоделските производители имаат интерес да го произведуваат и тоа по стандарди кои го бараат странските пазари, кои не се лесни да се достигнат во начинот на подготовка и чистење. Соработката со нив ни е на највисоко ниво, самите земјоделци планираат со време ориентирајќи се по календарот секоја година да биде спремен некаде 25 до до 30 дена пред католички Велигден, нормално тука исклучок се временските услови – вели за Агротим сопственикот на компанијата откупувач – Марин Димитриевски.
Колку е важно договорното производство најдобро зборува нивниот пример – земјоделците имаат сигурен пласман и добра цена, а откупувачот роба за извоз.
-Ние како фирма гледаме секоја година да се пробиваме на повеќе пазари и да имаме поголем спектар на пакување спрема клиентот врз основ на нивните услови на нарачка. Исто така да овозможиме поголема цена врз основа на тоа што секоја година се зголемуваат трошоците на нашите кооперанти. Оваа година очекуваме добар квалитет и квантитет, стабилна цена и нормално успешно пристигнување до потрошувачите. Како фирма за нас е успех пред се сезона по сезона зголемување на производството и квалитетот, лојалноста на нашите кооперанти сегашни и идни и позитивните рецензии назад од нашите потрошувачи. Очекуваме продуктивна сезона пред нас и за крај аирлија нека е! – изјави Димитриевски.
И ние посакуваме успешна откупна сезона и што поголем развој на Договорното производство.
