Шефовите на дипломатиите на Северна Македонија и на Бугарија, Бујар Османи и Николај Милков го отворија македонско-бугарскиот бизнис форум што денеска се одржува во Скопје под мотото „До една милијарда и понатаму“, во знакот на проекцијата од една милијарда евра трговска размена за оваа година меѓу двете земји.
Потпишани се четири договори од кои три од областа на винската индустрија и еден во делот на обезбедувањето и безбедноста.
Форумот го отворија министрите за надворешни работи Бујар Османи и Николај Милков, а на него учествуваат над 150 претставници од компании, стопанските комори и од економските институции на двете држави.
Целта на форумот е да се поттикнат нови можности за соработка, нови потенцијали што ќе ги препознаат и ќе ги употребат бизнисите за да се задржи позитивниот тренд на соработка. Во текот на последните две години трговската размена меѓу двете држави е зголемена. Во првите три квартали од годинава се бележи раст од над 50 проценти, а до крајот на годинава се очекува да се надмине прагот од една милијарда евра.
