По четири месеци заврши ловната сезона на крупен дивеч во земјава. Ловечкото друштво „Елен“ од Кичево ги реализира планираните бројки на отстрелан крупен дивеч и во идните месеци поточно, до почетокот на вегетација на природата, ќе се посвети на прихрана на дивечот.
Претседателот на ловечкото друштво „Елен“, Слободан Петрески, информира дека по четири месеци и 22 ловни дена заврши ловната сезона на крупен дивеч за оваа година.
– Традиционално ловот започнува на почетокот на месец октомври, а завршува со последниот викенд од месец јануари. Исклучок беа претходните години кога ловот започна нешто порано. Во годинешната ловна сезона ловечкото друштво „Елен“ ги оствари проектираните бројки на отстрелан крупен дивеч и радува фактот што и во оваа ловна сезона ловот помина без проблеми – рече Петрески.
Нагласи дека во текот на зимата и до периодот на вегетацијата во природата, ловечкото друштво ќе се посвети на прихрана на дивечот на хранилишта каде ќе се остава зрнеста и кабеста храна.
-Нашата обврска продолжува со прихрана на дивечот кој традиционално го вршиме секоја година во шесте ловишта на кои што сме концесионери. За оваа потреба на располагање ни стојат дваесет тони зрнеста храна, во најголем дел пченка, потоа кабеста храна сено, а на одредени места поставуваме и камена сол, која е неопходна за здравиот развој на дивечот во текот на годината. Храната се остава на места предвидени за прихрана на дивечот, хранилишта. Исто така, водиме сметка за да се намали или да се анулира крiволовот, за што се грижат тројцата наши ловочувари – додаде Петрески за МИА.
Покрај најголемото ловечко друштво „Елен“, во општината егзистираат уште две помали ловечки друштва кои располагаат со три концесиски ловишта, а тоа се ловечките друштва „Еко- фазан“ од Осломеј и „Сокол“ од Зајас.
