Во соработка со Академијата за земјоделски науки од провинцијата Шанси, во градот Линфен е развиен паметен овоштарник со круши кој опфаќа околу 33,3 хектари.
Во овој паметен овоштарник, на секоја круша ѝ е доделен уникатен QR код кој овозможува следење на целиот процес на раст, од цветање до развој на овошје, вклучувајќи следење на распоредот за наводнување и откривање на какви било болести, пренесуваат странските медиуми.
„QR кодот служи како лична карта и го евидентира животот на крушата“, вели Ванг Јибо, советник за земјоделство од округот Сисијан.
„Веќе не морам да го поминувам целиот ден работејќи на полињата“, рече Лиу Џианлонг, локален земјоделец, објаснувајќи како неговиот син му помага во далечинско следење на состојбата на овоштарниците преку паметен телефон, овозможувајќи навремено ажурирање и намалување на потребата за постојано физичко присуство на нивите.
Паметниот овоштарник е основан во 2020 година и со него се управува со помош на најсовремени технологии. Интеграцијата на услужниот центар за големи податоци одиграла клучна улога во подигнувањето на интелигентните производствени можности на земјоделската платформа.
Во округот има 64 села кои се потпираат на одгледувањето круши како примарно производство, што претставува 80 отсто од приходот на земјоделците.
Сисијан изградил платформа за паметно интегративно земјоделство составено од 12 системи, вклучувајќи интегрирано управување со ѓубрива, мониторинг на болести и инсекти, дигитален овоштарник со круши и следење и евалуација на квалитетот на обработливото земјиште.
Благодарение на оваа паметна платформа, садењето круши во областа имплементира низа дигитални операции во селекција на садници, садење, контрола на штетници и метеоролошка анализа.
Според зборовите на Ванг, паметната интегративна земјоделска платформа не само што помага во производството, туку и ја промовира продажбата бидејќи системот за следење што го нуди платформата може да собира податоци за маркетинг од прва рака.
Преку системот, одгледувачите на круши можат да се информираат за побарувачката на пазарот со цел прецизно да ги идентификуваат своите клиенти и да извршат насочена промоција на производите.
Во 2022 година, производството на овошје во областа достигнало 30 милиони килограми, а продажбата преку Интернет изнесувала 24 проценти.
„Моето семејство собра 46.500 килограми круши минатата година, од кои речиси 80 отсто беа продадени преку Интернет“, рече Лиу, додавајќи дека од круши заработиле годишен приход од 120.000 јуани (околу 16.768 американски долари).
