Младиот градинар Његош Стојадиновиќ од Пријепоље станал надалеку познат по производство на најкавлитетна пиперка. Поради големите приноси и квалитетни плодови, во полимската долина е познат и како „крал на пиперката“.
„Порано работев на гатери и многу се мачев. Преку ноќ одлучив да прекинам со тоа. Почнав прво со помали површини, на 15-20 ари и тогаш си велам, зошто не би работел и повеќе, хектар – два. Не ми е проблем да работам, сега почнав со садење на пиперки и на фолија, за што повеќе да го унапредам производството, бидејќи од оваа работа може убаво да се заработи“, вели Његош.
Овој млад човек пред 11 години ја донел најважната одлука во својот живот. Решил да остане на својата земја и земјоделството да му биде негово животно определување, бидејќи како што вели, човекот е најсилен кога е свој на своето. Зголемувањето на површините со насад го диктирала побарувачката која секоја сезона била поголема благодарение на квалитетните плодови.
На четири хектари плодна земја покрај самата река Лим, оваа година засадил 70 илјади стракови пиперка, нешто помалку зелка, малини и пченка. На секоја култура ѝ се посветува со големо внимание и во нива е од разденување до заоѓање на сонцето.
„Јас секогаш на сите кои се занимаваат со земјоделство им велам, ако не можете квалитетно да обработите четири хектари, направете два бидејќи на сѐ мора да се посвети максимално внимание. Кога е сезоната станувам во четири наутро и работам додека се гледа“, вели Његош и додава дека не треба ништо да се работи без волја.
Пиперката е, вели Његош, култура која бара многу, но ако сѐ се направи на време успехот е загарантиран.
„За пиперката се најважни првите 25 дена додека се зафати и се стабилизира. Треба доста наводнување, а важно е и на време да се напрска, бидејќи е чувствителна на бактериоза и пламеница“.
Пиперките од неговите насади се продаваат во Германија, во земјите во регионот и ширум Србија, а побарувачката во последните неколку години се зголемила благодарение на социјалните мрежи.
„Нема продажба без добра реклама и секако квалитет, тоа се главни услови, а социјалните мрежи сега ни даваат неочекувани можности“, тврди Његош.
„Његош веќе во три часот е во нива, наводнува, окопува, тука е од утро до мрак, но му недостига една невеста да го следи, не мора да копа, само да е тука да го охрабрува“, вели неговиот сосед Јован Радуловиќ.
„Девојките кога ќе ме видат вака со мотика, фреза и трактор не им паѓа на памет со мене да излезат. Денешните девојки сакаат забава и уживање, но не може да се ужива ако не се работи. Ова не е страшно ништо, земјоделството е работа која јас сакам да ја работам, точно е дека знам често да бидам валкан и со кал и прашина, но сум сам свој газда“, истакнува Његош.
Извор: agropress.org.rs
