Денеска бев на откупните пунктови и разговарав со производителите на ајварска пиперка во Струмица. Ги слушнав нивните забелешки и порачав дека договорените цени и класификацијата се обврска што мора доследно да ја почитуваат сите страни, информира министерот за земјоделство Борче Серафимовски.
Секој навод ќе биде проверен, а за секоја утврдена неправилност ќе следува законска постапка. Државата не ја определува пазарната цена, но ќе обезбеди законит, транспарентен и фер откуп, во кој трудот на земјоделецот ќе биде правилно вреднуван и платен.
На земјоделците не им се потребни тензии, туку сигурен откуп и институции што ќе останат со нив до конечното решавање на проблемот. Уште еднаш ќе разговараме со откупувачите и преработувачите и ќе го расчистиме секое отворено прашање.
По завршувањето на бербата ќе започнеме со подготовка на системски решенија што ќе донесат поголема предвидливост и поголема сигурност за македонските земјоделци.
Фејсбук статус на Борче Серафимовски
