Бројот на свињи расте, а цената опаѓа – така накратко може да се опише моменталната ситуација во Кина, која ги поддржува големи фарми, додека малите одгледувачи пропаѓаат. Нивниот увоз иако во пад, сѐ уште е висок, анализира Олаф Зинке за Агрархеуте.
Тој посочува дека производството на свинско месо во Кина се зголемило за речиси 30 отсто во 2021 година и достигнало околу 53 милиони тони. Според Кинеското биро за статистика, тој број е само малку помал отколку пред избувнувањето на африканската свинска чума (ASF) во август 2018 година, сето тоа благодарение на владините субвенции и поддршката за големите фарми. Во Кина беа изградени згради со дванаесет ката во кои се сместени овие животни.
Побарувачката останува слаба
Закрепнувањето следеше уште пред да се надеваат светските аналитичари. Сепак, побарувачката не ја следи понудата, таа и понатаму е релативно слаба, коментира Зинке, поддржувајќи го фактот дека цените се за 65 отсто пониски од истиот период пред една година. Интересно е што цените не растат без оглед на престојните празници во Кина. На 1 февруари се одбележува Кинеската Нова година кога побарувачката на свинско месо е многу голема, што е придружено со пораст на цените. Но не и 2022 година. Така, десет дена пред празниците цената за килограм е 13.500 јуани или 1,78 евра, додека лани во исто време чинела 30.000 јуани (4,16 евра).
Аналитичарите велат дека ќе биде потребно време за да се израмни пазарот, но дека производството секако ќе продолжи да расте.
Дали во Полска згаснува производството?
Поголемата понуда на домашно свинско месо секако ќе се одрази на побарувачката на ова увозно месо, односно нејзино намалување. Од 1 јануари Кина веќе ги зголеми увозните давачки од 8 на 12 отсто за повеќето производи од месо. Оваа одлука особено негативно влијае на земјите како Германија, која е најголем производител на свинско месо во Европската Унија, но и Полска, која држи 7,4 отсто од вкупното производство на ЕУ. Токму овој дел од Европа го погоди африканската чума и за жал болеста сѐ повеќе напредува.
Поради сето ова фармите во Полска пропаѓаат. Според порталот Фармер, полското здружение на одгледувачи на свињи (Полпиг) известило дека во 2021 година дури 31.500 фармери престанале да се занимаваат со одгледување свињи, што е повеќе од 30 отсто од сите регистрирани одгледувачи на овие животни. Во повеќето случаи тоа се најмалите, кои чуваат само неколку свињи, додека кај поголемите падот е сè уште ограничен.
Во Полска минатата година дури 124 фарми беа погодени од вирусот АСК.
