Земјите од Европската Унија до 9 јануари извезоа 15,85 милиони тони мека пченица во трети земји, објави Европската комисија, што е за околу 1,2 милиони тони повеќе од истиот период минатата година. Најголем извозник од ЕУ е Франција со 4,15 милиони тони, а потоа следи Романија со 4,0 милиони тони. На трето место е Германија со 1,9 милиони тони.
Досега најважни купувачи и извозни дестинации беа Алжир, Египет, Кина, Нигерија и Јужна Кореја.
Кога станува збор за тековната маркетиншка година, аналитичката компанија „Strategie Grains“ минатата недела ги намали прогнозите за извоз на овој вид пченица поради силната конкуренција од Аргентина и земјите од Црното Море. Тие паднаа на 31,2 од претходните 31,5 милиони тони. Посебно беше погодена продажбата во Северна Африка, особено француската продажба на алжирскиот пазар.
За следната сезона 2022/23, незначително е зголемена проценката за жетвата на оваа житарка во ЕУ од 127,6 на 127,7 милиони тони, додека цпроценката остана непроменета за јачменот и пченката и изнесува 51,8 и 66,4 милиони тони, соодветно. Аналитичарите сметаат дека производството на пченица и пченка во ЕУ во 2022 година ќе падне поради помалите површини и помалите приноси.
Помалку пченка и соја во Јужна Америка?
Поради неодамнешниот топлотен бран во Аргентина, тамошната берза за житарки, Росарио, минатата недела ја намали прогнозата за родот на пченка 2021/22 на 48 милиони тони од планираните 56 милиони тони. Приносот на соја би требало да се намали од 48 на 40 милиони тони.
Слична е ситуацијата и во Бразил, чиј југ е погоден од суша. Се предвидува да произведе 140,5 милиони тони соја, што е за 1,6 отсто повеќе од декемвриските прогнози. Кога станува збор за пченката, наместо 117,1, сметаат дека ќе произведат 112,9 милиони тони од тоа жито.
