Американската агенција за храна и лекови (FDA) откри дека 10% од увезените примероци на мед биле фалсификувани со нелегални засладувачи, што укажува на потребата од континуирано тестирање за да се спречи дистрибуција на неисправни производи на американскиот пазар.
Помеѓу јануари 2021 и март 2022 година, FDA собрала и тестирала 144 примероци на увезен мед во обид да идентификува производи кои содржат засладувачи, кои не се наведени на етикетата на производот, како што се евтини сирупи од трска и пченка, се вели во извештајот од 14 декември 2022 година, пренесува foodnavigator.
Само медот произведен од пчели од растителен нектар и кој не содржи дополнителни засладувачи може да се означи како мед. Ако медот содржи дополнителни засладувачи, тој мора да биде означен како „мешавина“ и тоа мора да биде вклучено во декларацијата за состојките, според федералниот Закон за храна, лекови и козметика.
Кога компаниите ги декларираат своите производи како мед, но вклучуваат и засладувачи, тие го прават тоа за да ги намалат нивните трошоци, но потрошувачите сè уште ја плаќаат целосната цена за она што е лажно означено како мед, а дополнителниот профит оди кај компаниите, соопштува FDA.
Тие дејствија претставуваат измама. FDA го карактеризира овој тип на измама под регулаторниот термин „економски мотивирано фалсификување“ или EMA.
Тестираните 144 увезени примероци потекнуваат од малопродажни пратки означени како мед од 32 земји, а биле тестирани на влезните пристаништа или на други локации каде што таквите производи обично се чуваат пред да влезат на американскиот пазар.
Четириесет проценти од тестираните примероци потекнувале од Индија и Виетнам, кои се двете најголеми земји увозници на мед во САД во четири од последните пет години.
FDA го анализирала секој примерок (се состои од три подпримероци од најмалку 240 мл мед) користејќи анализа на односот на стабилните изотопи на јаглерод за да се утврди усогласеноста со регулативата.
-Кога агенцијата откри дека подпримерокот има вредности на изотоп на јаглерод нетипични за автентичниот мед, агенцијата го класифицираше примерокот како неусогласен – соопшти FDA.
Од 14 позитивни примероци, четири се од Јемен, три од Виетнам, два од Доминиканската Република и по еден од Грција, Индија, Италија, Либан и Тајланд.
Примероците со додадени засладувачи се сметале за кршење на законот и биле одбиени да „влезат“ во САД. Дополнително, поврзаните компании и производи се ставени во алармниот систем за известување за увоз. Акциите се „во согласност со мисијата на агенцијата да се осигура дека храната е безбедна, здрава и соодветно означена“. Кога е потребно, агенцијата може да размисли за спроведување криминални истраги“, велат од FDA.
FDA ќе продолжи да го тестира увезениот мед за ЕМА, преку програмата за земање примероци од увоз и скрининг заснован на ризик. Покрај тоа, агенцијата соработува со меѓународни институции за прашања за економски мотивирано фалсификување поврзани со увозот, вклучително и мед.
Економски мотивираното фалсификување на медот е „широко распространето“, соопштува FDA, посочувајќи на податоците кои покажуваат дека 13% од медот во Канада и 14% во ЕУ е фалсификуван со недекларирани засладувачи.
FDA ги советува увозниците на мед и производителите на храна кои го користат медот како состојка за да ја осигураат автентичноста на нивниот мед и со тоа да помогнат во заштитата на потрошувачите.
Означувањето на пакуваната храна во меѓународната трговија мора да биде вистинито и не смее да го доведе во заблуда потрошувачот, согласно федералниот Закон за храна, лекови и козметика на САД – порачуваат од FDA.
