Сезона е на расадување на пиперот на отворено. Освен добрата подготовка на почвата, за сигурен и висок принос, најважен е квалитетот на расадот. Правилното извршување на сите агротехнички мерки и временските прилики секако се дел од една успешна реколта, што зборува за деликатноста на земјоделското производство.
Овој пат, темата ни е како до квалитетен расад на пипер, преку искуството на земјоделецот Гоце Саздов од село Сирково. Долгогодишен производител, некогаш на големи површини пиперки, а сега само на квалитетен расад како договорно производство, односно по нарачка.
-Порано во Сирково, односно во овој крај се одгледуваше многу пипер од сортата „куртовска капија“, а со тоа и се произведуваше многу повеќе расад. Но последните години како посигурно, односно како еднократна инвестиција им беа праските и така земјоделците ги зафатија поголемите површини со насади со праски. Сега произведувам расад само по нарачка, веќе договорено со земјоделци кои ќе садат. Со сопругата ова го работиме 20 години и познати сме по одличен квалитет на расадот – вели за Агротим, Саздов.
За расадот користат сопствено семе кое секоја година го добиваат од земјоделците кои ги одгледуваат пиперките. Може да се случи самите земјоделци да им дадат нивно семе и тие само како услуга само да го одгледаат расадот.
-Со работа почнуваме околу 18-23 март, со подготовка на леите, па сеење на семето, прихрана, заштита, наводнување…сите потребни агротехнички мерки, за после 20 мај до почеток на јуни да биде готов расадот и да се расади на нивите. Цената е 400 денари од метар квадратен во кој има 500 до 600 парчиња. Ваков начин на продажба ни одговара и нас и на земјоделците, наместо на парче – изјави Саздов.
На прашањето дали доколку има интерес би го зголемиле производството на расад, Саздов вели дека има можности и капацитети но потребен е интерес за договорното производство.
-Годинава објавив фотографии на Фејсбук бидејќи двајца од тие што ми нарачаа расад од оправдани причини не можеа да го купат. Ме изненади големиот интерес на производители од други региони кои веќе го купија расадот што ми беше вишок. Да кажам и тоа дека веќе ми најавија ако бидат задоволни од квалитетот оваа година, ќе нарачаат повеќе за следната. Ете можност за проширување на бизнисот – заклучува овој вреден земјоделец.
И повторно доаѓаме до потребата од организирано производство, од Договорно производство во повеќе земјоделски гранки, како најсигурно и за производителот и за купувачот.
После објавата на репортажата за Гоце Саздов и неговото производство на квалитетен расад на нашата платформа Агротим, сигурни сме дека ќе има повеќе нарачки за другата година и ќе го прошири бизнисот. Тоа е наша цел, да им помогнеме на вистинксите земјоделци и да го развиваме Договорното производство.
,
