Во расадникот „Мавровица“ кој е во сопственост на ЈП Национални шуми и е еден од четирите расадници во кои се произведуваат садници по контејнерски метод, деновиве се одвиваат тековни работни активности од страна на вработените во Подружницата Шумарство од Свети Николе.
Оваа метода за производство на шумски саден материјал се одликува со тоа што семето се сее во контејнери (гајби) кои се наполнети со супстрат од тресет, кои потоа се сместуваат во пластеници, каде им се обезбедуваат посебни услови, со што се постигнува поголем процент на ртливост на семето и се добива уедначен посадочен материјал.
Активностите се во насока на плевење и подрезување на околу 300.000 едно, две и тригодишни садници од црн и бел бор, аризонски чемпрес, смрча, јасен и даб.
По завршување на споменатите тековни работи, шумските садници ќе бидат спремни за есенско пошумување и зголемување на зелените површини.
