Иако министерката за финансии Гордана Димитриеска Кочоска се согласува со идејата на премиерот Христијан Мицкоски и министерот за транспорт и врски Александар Николоски, средствата одобрени за изградба на пругата кон Бугарија, да се пренаменат, за пругата север-југ, смета дека во пракса тоа би било невозможно.
Министерката на денешниот брифинг соопшти и дека веќе остварила средба со Европската инвестициска банка каде што ги бранела аргументите на Владата, но инвеститорите барале проектот да продолжи поради важноста за НАТО.
-Тоа е траса што води од Драч до Бургас. Хипотетички ќе ја направиме. Што ќе ни донесе таа, каква додадена вредност? Што ќе ни донесе економски? Европската инвестициона банка ми кажува „ама знаете, има НАТО аспект“. Супер! Јас многу отворено ги прашав: „Дали ќе нè сакаат НАТО и Европската унија ако ние банкротираме?“ Имаме проблеми со пругата кон Солун која е многу поважна за нашето стопанство, истакнува министерката – Гордана Димитриеска Кочоска.
Кочоска објасни дека наменскиот кредит во висина од 350 милиони евра одобрени од Европската инвестициска банка и од Европската банка за обнова и развој може да се користи исклучиво за таа намена за која е одобрен, а има и дополнителни 150 милиони евра грант.
-Ги слушам изјавите, но не е баш така. Еве, замислете дека сте земале наменски кредит од банка. Вие за друго не може да го користите. Исто е во овој случај, кредитите се наменски. Може само да ги замолите да ги резервираат тие пари и повторно да аплицираме за заем. – Гордана Димитриеска Кочоска.
Димитриеска Кочоска на брифингот информираше и дека од средствата за Западен Балкан, на први јули се одобрени само 1 милион евра за изработка на документација за точките за реконструкција на пругата од Коридорот 10 кон Грција, а после државата треба да ја прави финансиската конструкција и евентуално да бара грантови.
Извор: Канал5
