Советот на Европската Унија на почетокот од мај годинава го одобри Планот за раст на Западен Балкан за кој финансиската рамка е 6 милијарди евра, а износот за Македонија е 750 милиони евра. За овие пари, многу се зборуваше во јавноста, но како што објаснија од Министерството за финансии на денешниот брифинг со новинарите, само 250 милиони евра се грант, а другите пари се заем.
– Половина од 750 милиони евра, односно 375 милиони евра се заем за буџетска поддршка, но и една третина од преостанатите 375 милиони евра за кои треба да се аплицира со проекти, исто така се заем, додека преостанатите две третини се грантови. Тоа е ново и понеповолно во однос на првичните најави дека целиот износ од 350 милиони евра ќе бидат грантови – објаснија од Министерството за финансии.
Оттаму велат дека за парите за проекти треба да се исполнат бројни услови.
– За Министерството за финансии може да гарантирам, но не и за другите министерства дали ќе успеат да направат сè што е потребно. За да се повлечат овие пари има многу услови. Ако не се исполнат нема да ги искористиме парите – појасни министерката за финансии Гордана Димитриеска – Кочоска.
Министерката зборуваше и за досегашното немање на институционален капацитет да се користат парите.
– Од 2017 година до 30 јуни годинава само за провизии за неповлечени средства се платиле 27 милиони евра – рече министерката.
Извор – Слободен печат
