На неодамна одржаната пленарна седница на Европскиот парламент во Стразбур, италијанските претставници ја изразија својата поддршка за генетски модифицираните култури за време на разговорот со еврокомесарот за иновации и меѓуинституционални односи, Марош Шефчовиќ, пренесува Euractiv.
Дебатата се фокусирала на можните стратегии за приспособување на климатските промени, пред се на топлотните бранови и сушата, кои стануваат се почести и нивното влијание e се поразорно.
Италија погодена од суша
Топлотниот бран што ја погоди Италија донесе многу проблеми. Покрај недостатокот на влага во почвата, нема вода за наводнување, а во пет региони е прогласена вонредна состојба.
Реката По е на рекордно ниско ниво, а морето продира длабоко во копното. Во многу општини од граѓаните се бара рационализирање на трошењето.
„Европа ќе мора да биде во состојба да се справи и со овие мерки покрај итните“, изјави италијанскиот пратеник Антонио Тајани.
Тој побарал долгорочен план кој ќе гарантира снабдување со вода и ќе ја либерализира употребата на новите технологии на таканаречената потпомогната еволуција со нивно одвојување од правилата за ГМО. Тоа вклучува нови техники за одгледување растенија (New Plant Breeding Techniques – NPBT), кои претставуваат генетски инженеринг за подобрување на карактеристиките на растенијата, како што се отпорноста на суша и штетници.
Дали ГМО е решение за проблемот?
Во Италија, ГМО и новите техники на одгледување се сметаат за можно решение за проблемите кои произлегуваат од климатските промени. Неодамна Стефано Патуанели, министер за земјоделство, храна и шумарство, повика на укинување на забраната за употреба на ГМО за добиточна храна поради недостигот на италијанскиот пазар. Претставниците ја истакнаа потребата од култури отпорни на суша.
Комесарот Шефрович ја потврди намерата на Комисијата да работи заедно со земјите членки за време на вонредните ситуации. Тој рече дека Европа мора да дејствува кога станува збор за климатската адаптација, намалување на ризикот од катастрофи и подготвеност. Тој ја истакна потребата од подобро управување со водата и почвата.
ЕК, исто така, го истакна потенцијалот на новите геномски техники NGT кои можат да придонесат за постигнување на целите на Зелениот договор, кој ги вклучува целите за намалување на употребата и ризикот од пестициди за половина. Се очекува растечка дигитализација во земјоделството, со што би се намалила употребата на пестициди и ѓубрива заедно со биоинформатиката и геномиката на растенијата.
