Аронијата припаѓа на културите со висока содржина на растителни феноли, поради што е исклучително лековита.
Оваа листопадна грмушка расте во височина од околу 2-3 метри и 2.5 метри ширина. Лисјата се овални, назабени околу ивицата, во вегетацијата се темно зелени. Аронијата е растение кое сè повеќе се шири, успева во многу различни климатски подрачја.
Успева на места со повисока влажност на почвата, и на почви со висока потпочвена вода, но може да успева и на каменести површини со малку земја. При подигнување на насади треба да се избегнуват екстремно суви песокливи и збиени многу влажни почви.
Стеблото и цветот се доста отпорни на мраз, а посериозно оштетување од мраз може да се случи при температура од -23 во почетокот на зимата или -30 во средина на зимата. Поединечните цветови се со бела боја и собрани во гроздови. Гроздовите најчесто се состојат од 10-15, а на врвовите на ластарите и до 30 цветови. Цветањето трае околу 10 дена, а секој цвет поединечно цвета само 5 дена.
Воглавно цветовите ги опрашуваат пчелите, а можно е и опрашување со ветер, но аронијата е самооплодно растение.
Плодовите се ситни, округли со виолетово црвена до црна боја, тежината на една бобинка изнесува од 1,0 до 1,5 гр. Месото на плодот има интезивно црвена боја со слатко киселкаста арома која потсетува на боровинка. Аронијата особено се одликува со висока содржина на антоцијан, природен извор на боја, многу барана во прехранбената индустрија и содржи висока количина на витамини. Се смета за лековито овошје.
Плодовите најчесто зреат во исто време така што е потребна само една берба. Зрее во почетокот и средина на јули, а на повисоки места со поголема надморска висина дури и во почетокот на август. После бербата плодовите пожелно е што побрзо да се преработаат или да се замрзнат.
Старосниот век на аронијата се проценува на околу 20 години.
Аронијата е богата со антиоксиданси, флавоноиди, минерали во трагови, фолна киселина и витамини Б, Ц и Е. Поради високата концентрација на антиоксиданси и витамин Ц и Е, аронијата делува антивирусно, антибактериски и антивоспалително. Аронијата е богата и со антоцијани (антиоксиданси) кои го зајакнуваат имунитетот, го намалуваат ризикот од рак и го успоруваат стареењето.
Аронијата спречува појава на кардиоваскуларни болести, го намалува крвниот притисок и холестеролот, а позитивно влијае на зголемување на „добриот“ холестерол. Таа ја стимулира работата на црниот дроб и помага кај луѓе кои имаат жолчни камења. Исто така благотворно делува врз подобрување на варењето и работата на целокупниот дигестивен тракт. Ги намалува грчевите во цревата, помага кај воспаленија на цревната слузница, но помага и при дијареа. Аронијата е корисна и кај заболувања на мочните патишта.
Ова овошје помага и за слабеење и одржување на здрава телесна тежина.
