Александар Маринковиќ е млад земјоделец, пчелар, и косопственик на претпријатието кое се занимава со производство на мед и пчелни производи – „Зоралек“ во Градско.
Заедно со неговиот брат Александар од 2015 година се официјални сопственици на компанијата „Зоралек“ која нивните родители ја основале во 2005 година. Нивната основна дејност е производство на органски мед и органски пчелни производи. Имаат 1.500 пчелни семејства и во Македонија се едни од најголемите производители на мед. Покрај сопственото производство, вршат откуп и на мед од други пчелари, а исто така нудат и опрема за пчеларство, како и едукација на земјоделците.
-Нашата компанија се вика „Зоралек“ и е основана во 2005 година од страна на нашите татко и мајка, кои во 2015 година ни го припишаа сопствеништвото мене и на мојот брат. Како компанија имаме околу 1.500 пчелни семејства и во Македонија сме едни од најголемите производители на мед. Нашето производство е со органски сертификација, произведуваме органски мед и органски пчелни производи – вели Александар.
Преку мерката „Млад земјоделец“ како компанија набавиле опрема за етикетирање на медот и опрема за производство на медот што им овозможува да откупат поголема количина мед и други пчелни производи и да одговорат на барањата на Агенцијата за храна и ветеринарство кои ги пропишува за производство на храна од животинско потекло.
-Со мерката „Млад земјоделец“ добивме грант до 20.000 евра. Мерката ја поздравувам, се надевам дека Владата и Агенцијата за финансиска поддршка во земјоделството ќе овозможат уште многу вакви мерки каде што малите производители кои веќе имаат некаква основна опрема за производство ќе можат да набават дополнителна опрема. Ние набавивме опрема за етикетирање и со тоа овозможивме нашиот производ да го брендираме и моментално фокусот ни е за извоз на нашите производи и се трудиме да ја прошириме нашата продажба на странските пазари.
За да се издвоиме на пазарот од останатите производители на мед и пчелни производи, со брат ми одлучивме да основаме уште една компанија која ни е во партнерство со уште двајца браќа, кои работат во сопствена маркетинг агенција, и ни овозможија да дизајнираме нови етикети за медот, со што може да се издвоиме од останатите медови на полиците во маркетите. Направивме и прва електронска продавница за мед во нашата земја. Преку електронската продавница овозможивме да достигнеме преговори со потенцијален купувач од Саудиска Арабија, кој беше доста заинтересиран за нашите производи и со тоа остваривме извоз во Саудиска Арабија – вели Александар.
