Локалната самоуправа на Кочани ја почна изградбата на локалниот патен правец од населбата Оризари до туристичкиот локалитет Добра Вода за што се обезбедени над 26 милиони денари. Од Агенцијата за финансиска поддршка во земјоделството и руралниот развој се добиени 15 милиони денари, за кои претходно беше поднесена апликација преку Центарот за развој на Источниот плански регион. Остатокот од парите до вкупната вредност на инвестицијата е обезбеден со кофинансирање од општинскиот буџет, за што претходно согласност даде и Советот на Општината.
–По воведувањето во градежните работи на изведувачот „Бетон“ од Скопје почнува реализацијата на проектот за изградба на патот што води до манастирот „Пресвета Богородица“ во месноста Добра Вода, а за што имавме барања од поголем број жители на Оризари. Се работи за познато излетничко место, каде за време на манастирската слава се собираат неколку илјади верници и гости од регионот и пошироко, но посетено е и во текот на целата година, истакна градоначалникот на Кочани, Николчо Илијев.
Патот од Оризари до Добра Вода е со должина од два ипол километри и ширина од 3,5 метри. Покрај пробивањето и изградбата на неопходната инфраструктура, планирано е асфалтирање на коловозот и поставување на информативни табли и соодветна сообраќајна сигнализација.
