Почитувањето на плодоредот е многу важно во сите области на земјоделското производство, а пособено значење има и за органските производители. Почитувањето на плодоредот го зголемува приносот, квалитетот на почвата и ја намалува употребата на пестициди.
Плодоредот претставува организирана промена на посевите на истата парцела во текот на одреден број години. Плодоредот е една од најважните агротехнички мерки. Основен предуслов за избор на плодоредот се биолошките карактеристики на растенијата, како и на преткултурите.
Понекогаш во праксата, се користи одгледување на неколку растителни видови заедно, што е карактеристично за био-градината. Плодоредот има посебна улога во органското производство, бидејќи значително ја намалува појавата на растителни болести, штетници и плевели. Тука се воведува плодоред, со значителен удел на едногодишни и повеќегодишни мешунки кои ја збогатуваат почвата со азот.
Кога станува збор за плодоредот стручњаците ги препорачуваат следните 9 „златните“ правила, на кои се придржуваат голем број производители на органска храна.
- Растителни видови со длабок коренов систем треба да се одгледуваат после оние растенија со плиток коренов систем, со цел да се одржи добрата структура, аерација и растреситоста на почвата;
- Да се менуваат растителните видови кои произведуваат мала и голема биомаса на коренот – оние кои имаат голема биомаса обезбедуваат минерали за почвата.
- Да се менуваат растителни видови кои го задржуваат азотот од атмосферата со оние растителни видови што го трошат. Ова ќе обезбеди голем дел од потребите за азот;
- Секогаш кога е можно, треба да се примени претсеидба, посеидба, накнадна сеидба, меѓусеидба и зелено ѓубриво, така што почвата постојано да е под зелена покривка (на пр., сеење на репа после житото). Ова спречува создавање на плевел, формирање на кора, спречува истекување на ѓубривата, ја подобрува структурата на почвата и ја спречува нејзината ерозија;
- Растителни видови кои споро растат и оние кои се чувствителни на плевел, треба да се одгледуваат после оние што го спречуваат растот на плевелите (на пр., луцерка, мешавини од трева и детелина и т.н);
- Лисните и коренестите растителни видови треба да се менуваат со житни култури, за да се намали појавата на плевел;
- Секаде каде што постои ризик од инфекција со одредени растителни болести или штетници, треба да се избегнува сеење или садење на растителни видови кои се подложни на нив. Тука, треба да се следат правилата за минимален број години по кои растителниот вид може повторно да се стави на истото место;
- Користете различни сорти од ист растителен вид, со цел да ја зголемите генетската и друга разновидност;
- Да се менуваат пролетните и зимските култури, бидејќи со тоа се постигнува подобра контрола на плевелите и распоред на работата.
Извор: Агромедиа
