Престолнината на Туркменистан, Ашабад, е најскап град на светот за странските работници, покажало овогодишното истражување на трошоците за живот на американската компанија „Мерсер“ за управување со имот.
Во Мерсеровиот годишен извештај рангирани се 209 градови на светот врз основа на споредба на трошоците за живот, кои вклучуваат издатоци за стан, превоз, храна и забава, при што како споредбена основа е земен Њујорк, известува CNN.
Ашабад, кој бил втор на минатогодишната листа, некако се изделува од групата 10 најскапи градови за странските работници, во кој се наоѓаат главно светски деловни и финансиски центри како Хонг Конг, кој лани бил најскап, а оваа година втор, потоа Токио (на четврто место оваа година), Цирих (петти) и Сингапур (седми), наведува американска ТВ станица.
Како што се објаснува во извештајот на Мерсер, актуелната финансиска криза во Туркменистан, која довела до недостаток на храна и хиперинфлација, влијаела на скокот на трошоците за живот во Ашабад во последните неколку години.
Како најголемо изненадување во однос на минатогодишното истражување, од Мерсер истакнуваат дека Бејрут, кој од 45 позиција за најскап град за странски работници во 2020 година, скокнал на трето место оваа година.
Причините за таквите движења, според толкувањата од извештајот, се сведуваат на економската депресија на Либан, која ја влошила пандемијата на ковид-19 и фаталната експлозија во пристаништето Бејрут во август минатата година.
Европските градови оваа година исто така се рангирани како релативно поскапи од американските, со оглед на растот на еврото во однос на доларот од скоро 11 проценти, што резултираше со тоа Њујорк да излезе од Мерсеровите 10 водечки, додека Париз се искачи од минатогодишното 50 место на 33 место оваа година.
Слично е и со австралиските метрополи, како Сиднеј и Мелбурн, кои се искачија на ранг-листата поради апрецијацијата на австралискиот долар.
Што се однесува до најевтини градови за работниците од странство, на крајот на Мерсеровата ранг листа се наоѓаат Тбилиси, главниот град на Грузија (207 место), Лусака, Замбија (208) и престолнината на Киргистан, Бишкек (209), наведува CNN.
