Дека заштитените птици можат да бидат голем проблем во земјоделството покажува и случајот на полски фармер од околината на Језерска лагуна. Земјоделецот од општина Добре во областа Вилкополска, Збигњев Томчик, останал без 30 хектари засеана пченка за еден ден.
Обработливото земјиште е на осум километри од местото каде што се гнездат птиците, а особено заштитените видови како што се жеравите, пишува Фармер.
Томчика вели дека се големи и незаситни. Досега редовно ги гледал на своите ниви, но никогаш во толкав број:
„На мојата земја изброив 400 птици. Од мојата пченка што ја посеав на 30 хектари не остана ништо.“, вели тој.
Само за семе потрошил над 4.000 евра, а тука се и трошоците за ѓубриво и гориво. Не можел ништо да направи освен да гледа како се уништува плодот на неговиот труд.
Штетата нема да се надомести
Голем проблем е што полските закони и регулативи ги штитат птиците, но не ги обештетуваат фармерите. На фармерите не им е дозволено ни да ги плашат жеравите.
„Ни останува само да гледаме и да плачеме, бидејќи законот му ги врзува рацете на селанецот, дури и кога ќе му се уништи работата и имотот“, се жали земјоделецот.
Во Полска, најмалку десет години се води дебата за компензација за штета на полињата од заштитени видови. Во 2021 година, Националниот совет на земјоделски комори неколкупати побарал од Владата да ги промени прописите во оваа област.
И додека претставниците на Министерствата за земјоделство и за животна средина во своите одговори секогаш ги цитираат прописите кои докажуваат дека државната каса не е должна да ја надомести таквата штета, Владата не направила никаков напор да им помогне на земјоделците кои се повеќе страдаат.
