Во време кога светот и нашата држава се справува со Covid – 19, земјоделското производство не застана, а земјоделците дополнително се мотивирани поради очигледната неопходност од производството на домашно производство како најважно и најсигурно за секоја држава.
Еден од тие земјоделци кои и во време на криза инвестираат во земјоделското производство е и нашиот редовен читател Николче Ристевски од село Тополчани – Прилепско, кој ни се пофали дека неодамна купил нов трактор.
– Животот е добар ако работиш,ако не работиш нема да имаш. Желба ми беше да купам нов трактор од брендот John Deere и да обработувам поголема површина и тоа се исполни. Се едуцирам најмногу од интернет, фејсбук и Веб страни, најчесто веб страната на Агротим, но сепак за совет не ги заборавам искусните земјоделци татко ми, дедо ми и моите соселани – ни напиша Ристевски.
Тој е вработен во Битола во фабриката Kromberg&Schubert, а неговата сопруга дипломиран економист е невработена главниот иницијатор за зголемување на земјоделските површини кои ги обработуваат.
-Таа беше иницијатор за да се насочиме оваа година кон поголемо тутунопроизводство. А нашите две мали девојчиња Флора, 6 год и Ања, 5 год по препорака на реонскиот техничар и програмата на ALP на Тутунскиот Комбинат -Прилеп за намалување кон постепена елиминација на ,,детскиот труд” и на сите други злупотреби на човековиот труд во тутунопроизводството, остануваат дома со нивната баба. Обработуваме 3 ха површина од кој 1 ха тутун систем капка по капка. Од тутунот последниве неколку години добро се заработува. Работиме макотрпно сами со сопругата, од нива на работа, од работа на нива, тоа за мене е летниот период. Искрено ми недостига слободното време за кафе муабет со пријателите. Сега ќе ги следам огласите за аплицирање на државна земја и ипард фондовите -вели Ристески за Агротим.мк
Му посакуваме успешна работа и бериќета година!
