Бими или брокулини за кратко време стана препознатлив и баран вид зеленчук. Самото име доаѓа од јапонскиот јазик и значи вкусно. Создадено е со вкрстување на брокула и кајлан, лиснат зеленчук кој се користи во кинеската кујна.
Јапонските научници користеле традиционални техники на вкрстување за да го создадат овој уникатен зеленчук. Бими полека ја освојува Европа и може да се најде на пазарите во Германија, Шпанија, Португалија, Холандија, Обединетото Кралство и Франција.
Она што го издвојува бими од другите зеленчуци е тоа што брзо се подготвува, термички се обработува, а може да се јаде и сирово. Го нарекуваат супер зеленчук, бидејќи се карактеризира со висока содржина на витамини, минерали и други материи корисни за нашето здравје. Содржи повеќе од 10 есенцијални амино киселини. Во гастрономијата може да се приготвува на различни начини, може да се динстува, да се вари, да се бари на пареа, да се пече, а од него се подготвуваат салати и сосови.
Има уникатен вкус, кој потсетува на вкусот на јаткастите плодови. Одлично оди со секое месо или риба, а може да биде и самостојно јадење. По изглед е слично на брокулата, но цветната глава не е компактна и има долга, нежна дршка. Целосно се јаде, се јадат стеблото и нежни цветови. Идеален е за сите видови храна. Во 100 g има 35 Kcal.
