Здружението за спортско-рекреативен риболов „Мрена” од Крива Паланка вчера попладне изврши порибување на Крива Река со шеесет килограми пастрмка.
Порибувањето е извршено согласно годишниот план и договорот за концесија кои го имаат склучено со МЗШВ.
-Пастрмката е со големина од 70 грама а порибувањето се изврши на неколку локации на риболовниот ревир Крива Река 1- Кривопаланечки. И оваа година работиме на реализација на предвидената програма, заокружувајќи ја со порибување на две локации во риболовниот ревир „Крива Река 1″ и тоа: Крива Река и Дурачка Река. Согласно годишната програма за 2021 година на 29 овој месец е планирано порибување и со 100 килограми крап на браната Отошница – изјави Зоран Стоилковски, претседател на ЗСРК „Мрена” Крива Паланка.
Ова Спортско риболовно друштво постои повеќе од половина век и бележи успешни резултати во своето работење. Во моментов брои 270 членови. Во водите на Крива Река редовно се врши порибување со крап и пастрмка.
Инаку во октомври, на празникот на Крива Паланка, Здружението на спортски риболовци „Мрена“ организира сениорски републички куп натпревар во риболов на пливка „МРЕНА 2021“ .
На овој натпревар земаа учество 9 екипи, а се одржа на браната Отошница, кај Крива Паланка. За првите тројца најдобри организаторот обезбеди медали, пехари како и стокови награди.
Од ЗСРРК Мрена Крива Паланка известуваат дека ова е осма година по ред откако тие како концесионери на Крива Река 1 Кривопаланечки го организираат овој настан.
