Високи владини претставници изразија надеж дека првата пратка житарки според договорот ќе го напушти пристаништето Черноморск утре.
Олег Устенко, советник на украинскиот претседател за економски прашања, рече дека Украина може да извезе 60 милиони тони житарки во текот на осум до девет месеци, под услов нејзините пристаништа да не се блокирани.
Според него, Киев би можел да заработи десет милијарди долари од продажбата на 20 милиони тони житарки од претходната жетва и 40 милиони тони од новата реколта.
Министерот за надворешни работи на Русија, Сергеј Лавров, потврди дека за безбедноста на бродовите со украинско жито при пловидба во Црното Море, покрај Русија и Турција, ќе се грижи и друга страна, која подоцна ќе биде утврдена.
Според него, меморандумот на Русија и ОН, кој беше потпишан истовремено со договорите во Истанбул, „го обврзува генералниот секретар на Обединетите нации да го иницира процесот и да ги убеди западните земји да ги укинат сите ограничувања наметнати на извозот на руските житарки“.
Русија се надева дека генералниот секретар на Обединетите нации, Антонио Гутереш, ќе успее да го реши проблемот со санкциите кои го спречуваат извозот на житарки од Русија, рече Лавров.
„Нелегитимните санкции го спречуваат извозот на житарки од Русија, вклучувајќи осигурување, влез на нашите бродови во странските пристаништа и пристигнување на странски бродови во руските пристаништа“, рече Лавров по разговорите со египетскиот министер за надворешни работи, Самех Шукри.
