По повеќе од 40 години млекото и млечните производи од Србија ќе можат да се извезуваат во Саудиска Арабија. Овошјето и зеленчукот исто така може непречено да се извезуваат, а дозволите за извоз на овчо и говедско месо се очекуваат во следните 20 дена, стои на веб-страницата на Владата.
Министерот за земјоделство, шумарство и водостопанство Бранислав Недимовиќ се сретнал со претставници на Управата за храна и лекови на Саудиска Арабија, кои официјално го информирале дека Србија е ставена на листата на одобрени извозници на храна во таа земја.
Можноста за пласирање на српската храна на овој високоплатен пазар претставува одлична можност за нашите производители, особено во ситуација кога цените на храната достигнуваат рекордно ниво, велат од Министерството за земјоделство на Србија.
Вредноста на досегашната размена меѓу двете земји за производи што може да се извезат расте секоја година и само лани достигнала сума од 9 милиони американски долари, додека за шест месеци од 2022 година веќе е на ниво од 6 милиони американски долари.
