Од водите на Дебарското Езеро за првпат е извлечена риба од видот сончарка, информираа од Спортското риболовно друштво „Трофта”.
Рибата е уловена од делот кај општина Центар Жупа, а ја уловил риболовецот Агим од Тетово, кој често рибари на ова езеро.
Сончарка е мала слатководна риба, која се среќава во многу наши води од семејството Centrarchidae. Нејзиното латинско име е Lepomis gibbosus. Позната е под локални имиња јапонски караш, жолтица, јапек, јапич, јапонец, свиланец. Достигнува максимална должина од 15 сантиметри и максимална тежина до 400 грама.
Иако е мала по раст, сончарката е многу агресивна. Најмногу ја има во Северна Америка а е пренесена во Европа како аквариумска риба поради невообичаено убавиот изглед. Брзо се прилагодува на новите услови, а најдобро се снаоѓа во топлите, плитки, застојани води со многу билки.
Се храни со сите водни животни што успева да ги улови и проголта, вклучувајчи и млади риби и икра, па затоа ја нарекуваат „рибин плевел“.
Кон средината на април годинава, рибарот Африм Даци од Дебар за првпат во Дебарско Езеро, кај селото Џепиште, улови сом тежок 25 килограми. Даци, кој е долгогодишен страстен риболовец, тогаш за МИА изјави дека ловел пастрмки, крапови, мрени, скобал, но дека пред него никој не уловил сом.
Од СРД „Трофта” велат дека и тогашниот и денешниот случај се единствени досега од изградбата на акумулацијата пред повеќе од пет децении.
