Во сабота и недела во раните утрински часови ќе се спроведе авионска дезинсекција против возрасни форми на комарци, а пчеларите се повикани навреме да ги заштитат пчелните семејства.
Град Скопје ги информира граѓаните дека претстојниот викенд ќе се спроведе авионска дезинсекција против возрасни форми на комарци на целото подрачје на главниот град.
Според соопштението, прскањето е планирано да се реализира во раните утрински часови во сабота, 27 јуни и во недела, 28 јуни.
Од Град Скопје посочуваат дека доколку временските услови не дозволат реализација на дезинсекцијата во предвидениот термин, активностите ќе бидат одложени и ќе се спроведат првиот нареден ден кога ќе има поволни временски услови.
Воедно, градските власти упатија апел до пчеларите навремено да ги преземат сите неопходни мерки за заштита на пчелните семејства за време на прскањето.
Авионската дезинсекција е дел од редовните активности на Град Скопје за намалување на популацијата на комарци во летниот период и за заштита на јавното здравје.
