Правата подводна фарма на светот наречена Градината на Немо (Nemo’s garden) е единствена структура во близина на Џенова во Италија, која се состои од шест подводни стакленици во форма на купола. Ја креираше во 2012 година Ocean Reef групата. Чекор по чекор во овој проект почнале да се произведуваат разни растителни видови како босилек, разни сорти на салата, домати, тиквички, грав, грашок, алое вера, печурки и јагоди.
„Целта на проектот е да се создаде алтернативен систем на земјделство, особено посветен на оние подрачја каде што поради околните услови, но и економски и морофолошки причини растенијата не можат да растат“, стои на нивната службена интернет-страница.
Иако оваа фарма почна со работа пред девет години, во октомври 2019 година поради силното невреме претрпе сериозни штети и беше затворена. Меѓутоа, нејзиниот тим интензивно работеше за да ги обнови куполите исполнети со воздух кои се усидрени на дното на морето во кое растеше зеленчук.
Но, се појавил уште еден предизвик. Поради ограничувањата врзани за ковид-19 морале сѐ да одложат на неколку месеци. И покрај непријатностите кои ги снашле, фармата неодамна е повторно отворена, а нејзините основачи велат дека е поотпорна од кога и да е.
Туристичка дестинација, одгледување на риби и алги
„Секоја година откриваме нови можни примени за биосферата“, напоменува за Euronews Џани Фонтанес, главен координатор на овој проект. Освен зеленчук, во проектот се вклучени и туризам, одгледување на риби, морски алги, но и научно- истражувачки лаборатории и подводни станици за следење и истражување на диви животни.
Инаку, оваа градина е опишана како самоодржливо решение бидејќи користи обновлива енергија добиена од сонцето и водата добиена со десалинизација на морската вода. Исто така, микролимата и топлите услови се оптимални за раст на растенијата и добивање приноси за разлика од конвенционалните стакленици и не бараат дополнителни извори на енергија. Исто така, според основачите, станува збор за еколошки прифатливо решение бидејќи нема интеракција со морската околина и сродните екосистеми.
