Во денешното гостување на министерот за земјоделството Цветан Трипуновски во емисијата Студио 10 на 24ТВ се разговараше околу сите актуелни теми во овој период во земјоделското производство – Откупот на јагнето, исплатата на субвенциите, актуелниот повик за Млад земјоделец, штетите од мраз, пласманот на зелката, договорното производство на сончоглед и други прашања од интерес на земјоделците.
Трипуновски: Во моментов е шпицот во откупот на јагнето. Досега се откупени од страна на регистрираните кланици околу 120 000 јагниња. Цената е од 220 до 250 денари за килограм. Има една ситуација со дел од јагнињата кои не се продадоа за божиќните и новогодишните празници, а се со поголема тежина од тоа што треба да е прва класа. Ќе ја надминеме ситуацијата, по завршување на откупот ќе се обидеме да делуваме, да помогнеме на сточарите со измена, корекција на мерката со цел одгледувачите на овци да можат да ги искористат предвидените средства од мерката во целост за 2025 година – истакна Трипуновски.
