Во Истанбул започна со работа координативен центар кој ќе ја надгледува работата на „житниот коридор“ – контролирање на бродовите кои влегуваат во пристаништата на Црното Море да не доставуваат оружје во Украина.
По потпишувањето на договорот меѓу Русија и Украина за извоз на украински житарки од црноморските пристаништа, во Истанбул започна со работа координативен центар со учество на претставници на Украина, Русија и ОН, кој ќе ја следи работата на „коридорот на жито“, јавува АПК- Информ.
„Претставниците на Русија и Украина, како и претставникот на ОН, веќе почнаа да работат со Турција во заедничкиот координативен центар. Работите започнаа најбрзо што беше можно според договорот што го постигнавме, а сега се надеваме дека ќе функционира како што е наведено во договорот“, рече турскиот министер за одбрана Хулуси Акар.
Според договорот, ова тело ќе ги контролира бродовите за земјоделски производи што одат кон пристаништата на Црно Море и ќе проверуваат да не испорачуваат оружје во Украина.
Земјоделците ќе добијат пари за сеидба
Во петокот, министерот за земјоделска политика и храна на Украина, Микола Солски, рече дека благодарение на деблокирањето на извозот преку пристаништата на Црно Море, украинските земјоделци ќе можат да ги продаваат своите производи, да добијат пари за тоа и за точно еден месец – да сеат пченица.
„Поради затворањето на пристаништето, нашите земјоделци добија помалку пари од кога било, бидејќи сите трошоци отидоа во логистика. Извозот на жито во Полска, Балтикот, Романија и другите пристаништа чини многу“, нагласи министерот.
Три милиони тони месечно
Министерството за инфраструктура на Украина проценува дека трите пристаништа на Црното Море, Одеса, Черноморск и Пивдени, ќе можат да извезуваат околу три милиони тони земјоделски производи месечно, па и повеќе, изјави заменик министерот за инфраструктура и член на украинската делегација на преговорите Јуриј Васков.
Откако Одеса беше гранатирана минатиот викенд, постојат легитимни стравувања дека договорот нема да се исполни.
Украина планира да испрати стока во истите земји во кои извезуваше пред војната. Васков призна дека можеби нема да има доволно бродови.
„Сигурно знам дека има компании кои се подготвени да ја осигураат флотата. Но, се разбира, ќе биде потребно време да се достигне целосниот капацитет на пристаништето и осигурителните компании и сопствениците на бродови да видат дека сè функционира“, додава тој.
Треба да се напомене дека околу 18 милиони тони минатогодишни залихи се уште се заробени во оваа земја.
Извор: agroklub.rs
