Изминатата седмица времето беше претежно облачно со сончеви периоди со повремени врнежи од дожд.
Под влијание на влажен и студен бран до петок времето ќе биде облачно и студено со врнежи од дожд, кои наместа ќе бидат обилни. Вкупно од овој бран се очекува на повеќе места да наврнат над 30 l/m², а локално и над 50 l/m² дожд. Поради продор на постудена воздушна маса од север и засилен северен ветер, денес на планините врнежите ќе преминуваат во снег, а поради натамошно спуштање на студен воздух, во петок ќе има услови да преминуваат во снег и на некои од повисоките места. На повисоките планини ќе се формира значителна снежна покривка. Од сабота времето ќе биде стабилно со ниски утрински температури, а дневните ќе бидат во пораст.
Ваквите временски услови, со нови врнежи од дожд, се очекува да ја подобрат состојбата со влага во почвата. Ќе допринесат за зголемување на содржината на вода во почвата, која е потребна во овој есенски период за успешно навлегување на посевите, како и потребната влага која е потребна за есенска подготовка на почвата за садење на одредени култури.
Кај поголем дел од културите се очекува целосно да заврши бербата, а кај некои е веќе завршена.
Во недела на некои повисоки места во државата постои можност за појава на мраз. Раните (есенски) мразеви можат да се јават во октомври и првата половина на ноември. Есенските мразеви кај нас не предизвикуваат големи штети бидејќи во есен најголем број од едногодишните култури се веќе завршени со нивниот развој. Но, сепак земјоделците морат да бидат подготвени за појава на рани есенски мразеви и заштита од нив, како и да им овозможат на градинарските, поледелските и овошните култури да влезат подготвени во зимскиот период.
Минималната температура ќе се движи во интервал од -2°C на некои повисоки места до 8°C а, максималната температура ќе се движи во интервал од 4°C до 20°C.
