Старее популацијата во земјоделскиот сектор, ова е ситуација кај нас но и во земјите од Европската Унија. Според најнови информации, фантастични 25 милијарди евра следните години ќе одвои ЕУ за поддршка на младите земјоделци.
Според изјавите на министерот за земјоделство, Цветан Трипунуновски за Агротим, и кај нас Владата сериозно се фокусира на поддршка на младите земјоделци со носење на мерки кои треба да ги мотивираат да се занимаваат со земјоделско производство.
АГРОТИМ:Најавивте нови мерки и програми за директна поддршка на земјоделците, особено младите. Знаеме дека старее популацијата во агросекторот. Дали може нешто поконкретно да ни кажете во врска со ова, затоа што постои голем интерес од страна на младите земјоделци?
ТРИПУНОВСКИ: Како што знаете јас сум постојано на терен и имам директна комуникација со земјоделците и се согласувам со вас дека старее популацијата во агросекторот од една страна, а од друга страна се помалку млади ја превземаат работата на родителите или пак отвораат нов сопствен агро-бизнис. Затоа и во програмата за финансиска поддршка на руралниот развој, како во претходните години така и во новата буџетска година останува мерката 112 „Помош за млади земјоделци за започнување на земјоделско производство“ кои ќе користат финансиска поддршка. Исто така морам да истакнам дека во дел од мерките, младите земјоделци на возраст од 18 до 40 години при бодување добиваат повеќе бодови од другите земјоделци,како зголемен процент при кофинансирање.
Во иднина уште по-посветено ќе се фокусираме на младите кои ќе се вклучат во земјоделството како и креирање на нови мерки кои би биле во нивна корист.
АГРОТИМ: До каде е исплатата на субвенциите, дали ќе се одржи ветувањето до крајот на годината да се исплатат сите заостанати субвенции? Со каква динамика ќе се одвива исплатата?
ТРИПУНОВСКИ: Вие ги следите сите наши активности и ја следите динамиката која ја водиме во поглед на исплаќање на заостанати субвенции кон земјоделците. Јас неколку пати споменав дека наследивме девастирано земјоделство со повеќе закочени проекти, неисплатени субвенции и плати, претпријатија кои се на работ на егзистенција и така натаму… Досега откако започнав да раководам со министерството за земјоделство, шумарство и водостопанство, преку Агенција за финансиска поддршка во земјоделстото и руралниот развој имаме исплатено околу две милјарди денари за субвенции кон земјоделците. Последно исплативме 139.965.962,00 денари, односно, по 3 денари по килограм за остварено и продадено производство на пченица од Програмата за изменување и дополнување на Програмата за спроведување на интервентен фонд за земјоделството за 2024 година. Од агенцијата сум информиран дека се подготвени за сите исплати и во координација со Министерството за финансии се врши исплатата на субвенциите.
За пет месеци ги исплативме заостанатите обврски кон земјоделците од 2020,2021,2022,2023 година па дури имаше и некои од претходните години. Во наредниот период предвидена е исплата на субвенции од тековната година, нешто што не беше практика во минатото. Во новата година пред нас не чека многу работа и ќе се потрудиме да ја вратиме довербата кај земјоделците.
