Пратениците Даниела Колева и Панчо Минов синоќа на трибина на тема „лозарство“ во Кавадарци, ги информираа присутните производители на грозје за системските решенија за решавање на проблемите со кои се соочуваат лозарите.
Колева информира дека со Минов имаат чести средби со лозарите, со министерот и со претставници од Министерството за земјоделство, шумарство и водостопанство, како и со претставници на винариите, со цел изнаоѓање системски решенија за проблемите на лозарите.
– Доаѓаме од овој крај и знаеме со кои маки се соочува лозарството. Се надевам дека со сите наши предлози и законски измени, ќе можеме да ги решаваме проблемите. Последен закон што беше донесен во Собранието е законот за изменување и дополнување на законот за земјоделство и рурален развој, поднесен од нас неколкумина пратеници. Законот што го донесовме е одличен, децидна беше таа, осврнувајќи се меѓу другото, на зелената нафта, триесет проценти авансната исплата на субвенциите и други одредби.
Колева потсети на актуелните мерки од изминативе години, во интерес на лозарите. Говореше и за новиот закон за вино, кој е во фаза на изработка и е речиси готов и се очекува да влезе во собраниска процедура, за одредување на производствената цена за килограм грозје.
-Разговаравме и ги образложивме новите предлог закони, како и воведувањето на производна цена на грозјето, во новиот закон за вино. Слушнавме голем број конструктивни предлози и ќе излеземе во пресрет за сите нивни барања, продолжуваме понатаму, секогаш транспарентни и достапни, рече Колева.
Вуко Мелов, советник во Советот на општината Кавадарци, рече дека има проблеми во лозарството, кои се влечат од минатото, но дека лозарите ја имаат поддршката од државата. Тој меѓу другото потсети и на субвенционирањето на лозарите минатите две години.
Пратеникот Минов се осврна на заложбата за скратување на рокот за исплата на откупените количини. Говореше и за нужната потреба од одредување на производствена и гарантирана цена за килограм винско грозје. Бидејќи, како што нагласи, лозаровинарството е од стратешко значење, многу голем број на домаќинства се занимаваат со оваа работа.
Присутните лозаропроизводители од Тиквешкиот регион се согласија дека долгогодишните проблеми треба да се надминуваат со системски решенија. Дел од лозарите се пожалија на зголемените трошоци за производство на грозје, долгогодишни манипулации со технолошката зрелост и шеќерните единици од страна на откупувачи, лоши договори за откуп од страна на винарии.
Раководителот на подрачната единица на МЗШВ, Митко Керов рече дека за сите отворени прашања, им стојат на располагање на производителите, со цел решавање на евентуалните проблеми.
Извор: МИА
