Директорот на АФПЗРР Илија Стоилев во емисијата Студио 10 на 24ТВ најави дека до крајот на оваа година ќе се исплатат сите заостанати субвенции и голем дел од 2024 година.
– Со доаѓањето на Владата се доделија 600 милиони денари за подмирување на долгови за неисплатени субвенции за изминатите 2021, 2022 и дел од 2023 година, некои мерки воопшто не беа исплатени, некои половично па беа доплатени. Со ребалансот се издвоија уште 1.280.000 денари. До крајот на 2024 година ние нема да имаме неисплатени обврски ниту за 2022, ниту за 2023, ниту за 2021 значи до последен денар земјоделците ќе бидат исплатени. Се прават напори и од страна на Министерството за финансии и од МЗШВ заедно со Владата да се изнајдат средства да се исплати голем дел од 2024 година.
Стоилев се осврна и за исплатата на субвенциите за органското производство.
-Разговаравме и во делот на органското производство, кое го субвенционираме, нормално ние имаме стада и површини кои се сертифицирани но има еден друг проблем дали ние имаме органски производ, дали имаме каде да го купиме или имаме само сертифицирани површини и стада. Во делот на органското производство ние како Агенција имаме контрола на терен, но морам да ви кажам дека тој сектор за контрола на терен е премногу оптеретен. Тој сектор го контролира органското производство, директни плаќања, националната програма за рурален развој и ИПАРД програмата.Секогаш кога се забележат веднаш се нотираат и во реално време веднаш се процесуираат доколку се открие дека има злоупотреби. Имаме соработка со АХВ во сточарскиот дел и со сите останати институции – рече Стоилев.
