Копарот потекнува од подрачјето околу Средоземното Море. Старите Египјани, а подоцна и Грците и Римјаните го користеле како лековито растение.
Се користат листовите за супа, сосови, како додаток на јадења. Цветовите, листот и младото растение копар се користат за конзервирање на зеленчук, но и во фармацевтската индустрија. Богат е со етерични масла кои даваат специфичен мирис и вкус. Листот копар е богат со витамин Ц.
За копарот постојат голем број народни верувања како што се дека чајот од копар ја лечи слабоста на желудникот и помага при варењето, а на жените доилки им го засилува млекото.
Копарот е едногодишно растение. Коренот му е вретенест и длабок. Листовите се повеќепати поделени со залистоци, со светло зелена боја. Во генеративна фаза стеблото се издолжува и се разгранува. Достигнува височина од 80-130 см. На врвот на стеблото е делот со цветови со зеленкасто жолта боја. Семето му е ситно со темноцрвена боја.
Може да се одгледува на нива, во градина, во заштитен простор и тоа како зачинско растение или како индустриски вид. Копарот се сее во повеќе наврати, секои 15-20 дена.
Длабочината на сеидбата е 1,5-2 см. Сеидбата почнува во март и завршува на крајот на јули и почетокот на август. При производство на зачински копар растојанието меѓу растенијата е 20-25 см. За сеиба е потребно околу 8 кг/ха семе.
Бербата за зелените пазари е кога растението достигнува височина 15-25 см и има развиени 3-4 листа. За индустриско користење, зависно дали користиме цело растение или семе, се врши отсекување на целото растение и тоа кога растението достигнува височина од 30-60 см.
Бербата започнува во мај и треба да трае континуирано до крајот на октомври.
