За да ги заштити домашните земјоделски производители, особено производителите на овошје и зеленчук, Србија планира да воведе доплнителни царини за увоз на овошје и зеленчук, пишува српскиот весник Вечерње новости.
Тоа би значело, дека фирмите ќе треба да плаќаат дополнителен надомест за увоз на овие стоки. Меѓутоа, не е познато дали дополнителната давачка ќе се однесува на сите растителни производи или само на оние кои се произведуваат во земјата.
Министерот за земјоделство на Србија Бранислав Недимовиќ, изјави дека оваа одлука сè уште не е донесена, но голема е веројатноста таа да биде донесена во наредните неколку дена.
Српските земјоделци, а особено производителите на раноградинарски култури во овој период имаат големи проблеми со пласманот на сезонскиот зеленчук. Бидејќи државата ги затвори пазарите, пласманот на зелената салата, тиквичките, ротквиците, кромидот и другиот сезонски зеленлук до потрошувачите е тежок и скоро невозможен.
Некои експерти предвидуваат дека повеќе од 50% од овој зеленчук ќе пропаднат, бидејќи не може долго да стои, ниту пак има можност да се чува во ладилници.
„ Јас апсолутно сум за воведување дополнителни царини за увозот на овошје и зеленчук, доколку тоа овозможи да се заштити домашното производство и српскиот земјоделец”, вели Милан Простран, агроекономист .
Според неговите зборови сега е време кога овошјето и зеленчукот тешко стигнуваат на пазарите. И тоа што ќе стигне до трговските објекти е многу малку. Домашно овошје сеуште нема, па ваквите доплнителни прелевмани би имале смисла за увоз на јаболка и цреши. Сеуште е рано да се каже дали дополнителните такси би се однесувале и за лимоните, бананите и за останатото јужно овошје.
Воведувањето на прелевмани за увоз на одредени нема да биде првпат во Србија. Во 2015 година Србија воведе царински давачки за увозот на млеко, млечни производи и свионско месо со цел да ги спречи штетите на домашниот пазар кога на европскиот пазар се создадоа вишоци кои се извезуваа, а Србија сакаше да го заштити домашниот пазар. Кон крајот на 2016 година овие давачки беа укинати во најголем дел по притисок од страна на ЕУ.
Доколку Србија одлучи да воведе царини за увоз на земјоделски производи, можно е да се јават голем број на реакции од страна на мноду други земји бидејќи тоа би значел прекршување на веќе постојните договори за слободна трговија.
