Изминатата седмица имавме променливо и нестабилно време, сончево и топло, со повремени поројни врнежи од дожд, информира УХМР.
Житните култури во овој период имаат сосема доволно влага и се во добра состојба. Есенскиот јачмен во зависнот од локацијата каде е посеан, е во фаза на млечна зрелост. Започнува последната фаза од животниот циклус на житата – зрелост, каде овде се случуваат поголеми квалитативни промени, пред се, во зрното. Сончогледот како индустриска култура се наоѓа во фаза на никнење, неговата коренова маса има голема продуктивност, со голема моќ на впивање вода од подлабоките почвени слоеви, со тоа што овие резерви на влага ќе бидат корисни во наредните фази на интезивен пораст, кога се потребни повеќе од 40% од вкупните потреби на растението за вода, односно од цветање до физиолошка зрелост. Со оглед дека синтезата на масло кај сончогледот значително зависи од присуството на доволно количество на почвена влага. Овошките во овој период се во интензивен раст, се препорачува да се продолжи со нивна прихрана и третирање против болести и штетници. Кај виновата лоза може да се почне со отстранување на страничните ластари (филизи) во почетокот на нивниот раст. Се препорачува нивно отстранување над гроздовите. Ова е и период на интензивно расадување на тутунот, и на градинарски култури на отворено. Поради поволните услови кои беа во претходниот месец, расадувањето на тутунот во некои региони е веќе започнат. Обезбеденоста на вода при садење на тутунот има важна улога заради подобро вкоренување.
Времето денес под влијание на влажен бран, кон крајот на денот, во текот на ноќта кон петок и во петок најпрвин во западните, а потоа и во останатите делови, ќе има обилни врнежи од дожд (над 30л/м2). На повисоките планини ќе има услови за повремен снег, ќе дува умерен до засилен југоисточен, а во петок северен ветер (над 60км/ч), особено вдолж Повардарието. Дневните температури значително ќе опаднат. Во деновите од викендот и во понеделник ќе има услови за слаб локален дожд, а дневните температури повторно ќе бидат во пораст.
Доколку временските услови дозволуваат земјоделските производители да продолжат со сите земјоделски активности и агротехнички мерки, да се преземат превентивни мерки за зацврстување на пластениците и другите конструкции, да се расчистат одводните канали за полесно одлевање на површинските води и заштита од нив. Во случај на појава на електрични празнења се препорачува поголема внимателност, да не се престојува под отворен простор. Минималната температура ќе се движи во интервал од 1°C до 12°C а, максималната температура ќе се движи во интервал од 10 °C до 28 °C.
