Изминатата седмица имавме променливо облачно време со повремени врнежи од дожд. Максималното дневно количество на врнежи од дожд, 41мм беше регистрирано во Гевгелија на 30-ти. Во последните шест дена од месецот на повеќе локации во државата, имавме циклонален продор со континуирани ефективни и краткотрајни поројни врнежи пропратени со изолирана појава на град и грмежи.
За земјоделското растително производство од големо значење е интезитетот на врнежите. Дождот може да биде со мал интезитет (ситен дожд) или со голем интезитет (пороен дожд). Интензивните поројни дождови можат да бидат штетни поради засилување на ерозивните процеси на наклонети терени, а можат да предизвикаат поплави и оштетување на земјоделските култури. Обилните врнежи може да доведат до создавање на поројни водотеци и можни излевања и поплавувања на одредени земјоделски површини. При интензивни поројни дождови почвата не може да ја впие целата количина вода, така на пример кога паѓа пороен дожд за половина час почвата впива 35 %, а при ситен дожд за време од 6 часа почвата впива некаде околу 93%. За растителното земјоделско производство од најголема полза се ситните, рамномерни дождови со помал интезитет. По такви дождови почвата останува во поволна состојба за обработка за сеидба, посевите поинтензивно се развиваат.
Сепак, овие врнежи што паднаа се од големо значење за сите земјоделски култури и ќе допринесат за зголемување на влагата во почвата која е потребна за пролетната подготовка на почвата за садење на одредени култури. За стрнишните жита кај нас од суштинско значење се врнежите во периодот од почетокот на март до почетокот на јуни. Пченицата најголеми количини на вода троши во фазите вретенисување, класење, млечна зрелост. Фазата на вретенење се одвива во пролетниот период. Во почетокот на оваа фаза се оформуваат репродуктивните органи, од кој ќе зависи и плодоносењето, и затоа во оваа фаза растението мора да има доволно количество вода и хранливи материи. Токму поради тоа, овој дожд позитивно ќе се одрази врз есенската пченица.
Овошните култури имаат најразлични барања во однос на водата, поради длабокиот корен, па поради тоа релативно лесно поднесуват суша, но потребно е оптимална влажност во почетокот на вегетацијата за нормално цутење и формирање на плодови. Потребата за вода кај младите насади има големо значење за брз, уедначен пораст и формирање на насад со добра кондиција. При недостиг на вода во текот на порастот на плодовите, тие остануваат ситни, а може да дојде и до нивно опаѓање. Заради тоа овие врнежи имат позитивно влијание.
Исто така, поради повисока релативна влажност во зоната на растенијата, може да се создадат поповолни услови за појава на растителни болести и штетници, па поради тоа потребно е преглед и контрола на посевите.
Во наредните денови до сабота ќе има локална појава на нестабилност со пороен дожд, грмежи и засилен ветер. Во недела поради продор на студена воздушна маса од север ќе има врнежи од дожд на планините од снег. Температурите значително ќе опаднат и врнежи од снег се очекуваат и на повисоките места. Ова значително опаѓање на температурата кое се очекува во почетокот на следната седмица, може повторно да ги загрозат земјоделските култури, посебно овошните дрвја со можност за појава на мраз, како и да причинат штети, претежно оние кои се веќе процветени.
Препорака: Земјоделските производители да преземат содветни мерки за заштита на нивните посеви против измрзнување, да се расчистат одводните канали за полесно одлевање на површинските води и заштита од нив, да се преземат превентивни мерки за зацврстување на пластениците и другите конструкции, да ги заштитат растенијата посебно овошните видови од појава и развој на болести и штетници, редовно да вршат следење на нивните посеви и други потребни агротехнички мерки.
Минималната температура ќе се движи во интервал од -6°C до 8°C на повисоките места а, максималната температура ќе се движи во интервал од 3°C до 19°C.
Извор – УХМР
