Агротим на терен: Селата во Тетовско, потенцијал за рурален туризам, можност за развој со директна поддршка на локалната власт.
Ова може да биде работниот наслов од вчерашната посета на неколку села во Општина Тетово: Бозовце, Вешала, Бродец, Шипковица и Гајре.
Кое од кое поубаво село, сместени во планинскиот предел опколени со зеленило, тивко, мирно, чист воздух и мештани со секојдневните обврски и задолжителниот чај пред продавница.
Ова е романтичниот дел од приказната за руралниот развој, другиот дел, она што нас нè интересираше е каква е можноста оваа убавина да ја видат и доживеат домашни посетители и странски гости. Каква е можноста жителите од овој регион да инвестираат во руралниот туризам, да се понуди автентичноста како предност, да се искористи сè она што природата го подарила како основа за нивна заработка и вработување на членовите на цели фамилии.
Со една таква мисија, во соработка со Општина Тетово и иницијативата на градоначалникот Касами за поголем рурален развој, посетивме и остваривме средба со сопственици на ресторани, земјоделски производители, сточари, како и луѓе кои имаат активности за здружување на жителите со заедничка цел – да се развие руралниот туризам.
Првичните разговори секогаш почнуваат со доза на скептицизам, разочараност и недоверба во институциите на централно и локално ниво.
Нема да биде претерано ако кажам дека нашата иницијатива и идеја на Општина Тетово, со формирањето на секторот за поддршка на руралниот туризам, наиде на одушевување. Или со нивни зборови кажано – „Досега никој вака не бил да нè праша што ни треба“.
Можностите за зголемување на постоечките капацитети со апартмани, изградба на нови сместувачки капацитети, куќи адаптирани за издавање на туристи, заедничка понуда на традиционална кујна и многу други активности се можни со користење на ИПАРД-средствата и други европски фондови. Поддршката од страна на секторот за рурален развој во Општина Тетово е во информации за повици, обезбедување на потребната документација за апликации и реализирање на бизнис-идеите.
Тоа е новото во случајот со Општина Тетово, а докажано како најважно заради заедничкото делување на локалната и централната власт.
Ленче Николовска
