Со промоција на дел од производите на земјоделските задруги, со доделување на признанија на поединци и организации кои активно придонесуваат за развој и афирмација на задругарството, со потпишување на меморандуми за соработка со организации, установи и институции, како и панел дискусија на тема „Задругите партнери за забрзан одржлив развој“ со претставници на мрежата на земјоделски задруги, МЗШВ, научно образовни институции, локална самоуправа и гости од регионот, во организација на Мрежата на земјоделски задруги во саботата се одбележа 101-виот Меѓународен ден на задруги.
„Одговорот за силен и моќен земјоделец е во задругарството, и во овој правец треба да се движи македонскиот аграр. Поголемо и поквалитетно производство, сигурен пласман, повисока поддршка од државата и поголем профит, се само некои од придобивките на задружното здружување, беше истакнато на одбележувањето на 101-от Меѓународен ден на задруги во с.Крани, Ресен од страна на присутните говорници!
Македонската асоцијација на земјоделски задруги веќе 11 години по ред, првата сабота од месец јули, го прославува Меѓународниот ден на задруги кој на истиот датум секоја година паралелно се одбележува во целиот свет.
Ни беше чест и особено сме благодарни за присуството на настанот од страна на претседателот на Задружниот Сојуз на Република Србија г-дин Никола Михаиловиќ, претставнците на Задружниот Сојуз на Јужна Србија, градоначалникот на општина Ресен г-дин Јован Тозиевски како и претставникот на Министерството за земјоделство, шумарство и водостопанство г-дин Боро Каевски. Особена благодарност упатуваме и до членките на земјоделската задруга ,,Крани,, од с. Крани за покажаната несебична поддршка при организирање на настанот и за тоа што беа одлични домаќини. Благодарност и за руралните жени од Преспа кои преку голем број традиционално подготвени специјалитети не доближија до специфичниот и уникатен вкус на Преспанскиот регион што беше додадена вредност на настанот и особено уживање за присутните гости.„, стои на фејсбук-страницата на Здружението Македонска асоцијација на земјоделските задруги.
Под темата „Задруги за одржлив развој“, задругарите ширум светот се повикани да го прослават овој ден и да покажат дека задружниот модел за организација го има исполнувањето на Цели за одржлив развојни (SDGs) како дел од својата ДНК, инспириран од кооперативните вредности и принципи.
Годишното прославување на овој ден, се вели во соопштението од Мрежата на земјоделски задруги, го препознава значителниот придонес на задругите кон глобалната економија и нивната улога во градење на поодржлива иднина.
-Со оглед на тоа што задругите се едни од најстарите и најголемите деловни мрежи во светот, задружното движење беше првата група на претпријатија на светско ниво кое ги поддржа целите за одржлив развој и е препознато како партнер за нивно постигнување, велат од Мрежата на земјоделски задруги.
Настанот, како што информираат од Мрежата на земјоделски задруги, е поддржан и од Министерство за земјоделство, шумарство и водостопанство.
