Високо патогениот тип на птичји грип H5N1 е пронајден и во североисточна Германија, соопшти нивното Министерство за земјоделство и животна средина. Болеста е потврдена на фарма во Хоенкирхен во северната провинција Мекленбург-Ворпомерн, што е трет случај во таа земја, а вирусот е откриен кај 17 кокошки, 28 патки и две гуски.
Најчесто од една во друга земја го пренесуваат дивите птици, поради што брзо се шири во Европа, предизвикувајќи загриженост во живинарската индустрија, откако претходните епидемии доведоа до евтаназија на десетици милиони птици и ограничувања на меѓународната трговија, пишува Ројтерс.
Птичјиот грип е потврден и во БиХ, на северот од земјата, во Градишка, каде што починал лебед, заразен со силно патоген сој.
Критична состојба и во остатокот од Европа
Полска, исто така, пријави неколку случаи на појава на птичји грип од типот H5N1 на живинарски фарми со речиси 650.000 животни, објави Светската организација за здравје на животните (OIE). Земјата е најголемиот производител на живина во Европската Унија, што предизвикува загриженост кај јавноста.
Потврдени се пет случаи на истокот од земјата, каде што се заразени мисирки на дури четири фарми, а зафатена е и една фарма каде што се одгледуваат бројлери. Меѓутоа, болеста се проширила и во Западна Полска, каде што се заразени гуски и мисирки.
Минатата недела француската влада ја стави целата земја во состојба на готовност поради оваа болест и нареди да се затворат сите јата. Одлуката беше донесена откако холандските власти, исто така, им наредија на комерцијалните одгледувачи минатиот месец да ги задржат сите јата во затворени простории, бидејќи на едно од нив бил пронајден вирус. Минатата зима француските власти беа принудени да уништат околу 700.000 патки за да го спречат ширењето на вирусот, пишува Politico.
Во меѓувреме, птичји грип од типот H5N1 е забележан и во Велика Британија, во централниот дел на земјата. Минатата недела беа објавени правила за превенција и им беше наложено на лозарите да ги заострат мерките за биосигурност.
Извор: www.agroklub.rs
