Средношколците од Електротехничкото училиште „Никола Тесла“ во Белград направиле еколошка антивирусна кошница. Производот, дизајниран од Никола Теомировиќ, Иван Николиќ и Миодраг Милановиќ, собран во тимот на „EcoHive“, под менторство на професорот Милан Станојчиќ, неодамна беше прогласен за најдобра технолошка иновација во категоријата средно училиште од Ректоратот на Универзитетот во Белград.
Предводникот на тимот, Никола Теомировиќ вели дека вароата како вид крлеж претставува голема опасност за пчелите, во што и самиот се уверил бидејќи е пчелар. Преку човечка негрижа се проширува од Азија, а досега се познати само нееколошките „лекови“ за лекување. Меѓутоа, контраиндикациите се големи – медот може да се користи дури по шест месеци од завршувањето на „терапијата“, а се случува и да не може да се јаде. Мравјата киселина е позната како еколошко средство, но тешко се дозира – потребна е температура пониска од 24 степени, но и посета на кошница на секои два дена.
–Ние го усовршивме тој третман и им овозможивме на пчеларите да ја завршат останатата работа со посета на пчеларникот само еднаш. Производот се става во специјална направа на кошницата, а третманот трае 21 ден. Со оглед на тоа што вароата обично се задржува во кошницата 14 дена, а пчелите излегуваат на секои 21 ден, го опфативме целиот период. Ефикасноста е 95%. Мравјата киселина е веќе позната во борбата против вароата, но требаше да се најде апарат кој на вистински начин ќе ги искористи нејзините можности – вели Никола.
Неговиот колега од тимот, Иван, открива дека планираат да го усовршат својот изум во наредниот период. Бидејќи уредот се поставува на секоја кошница, тоа би било невозможно кај големите пчелари. Затоа, како што посочува, ќе изгради централа која ќе покрие пет или повеќе кошници. Веќе разговарале со Здружението на пчелари на Србија, кое е заинтересирано за соработка.
Професорот Станојчиќ, ментор на тимот, посочува дека најважно во иновативноста е тоа што постои проблем. Така и учениците дошле до идеја за производ кој не постои на пазарот, а ќе реши голем проблем со кој се соочуваат пчеларите. Тој вели дека слуша повеќе од 50 идеи годишно, вклучувајќи ги и оние кои се невозможни.
-Кога ми ја претставија идејата, ми беше мило што размислуваат во насока на заштита на животната средина и во насока на нови извори на енергија. Во денешниот свет, ова се два важни елемента за успех. Сами смислија сѐ и успеаја, што покажува и наградата што ја добија. По победата повторно се сретнав со нив и им кажав дека тоа е само еден чекор. Им кажав дека ако навистина сакаат да продолжат, имаат уште многу работа. Тука сум да им помогнам, но ако немаат мотив и желба, нема ништо – вели Станојчиќ.
Младите иноватори наведуваат дека нивниот производ е уникатен. Во Хрватска има сличен кој ја загрева кошницата на 45 степени, така што пчелата преживува, а вароата се уништува. Меѓутоа, тоа го попречува животот во кошницата. Уредот што се користи во Америка работи на принцип секоја рамка да се вади од кошницата, да се стави во стабилизаторот и да се врати назад, што е комплицирано.
Овие ученици сакале да направат еден уред кој ќе прави сè и успеале во тоа.
Извор: ekapija.com
