Зимската резидба/кроење на виновата лоза е агротехничка мерка со која започнуваат сезонските работи во лозјата и истата се извршува редовно секоја година. Лозата се реже за да го забрза почетокот на пораното доаѓање во род, да и даде одредена форма на пенушката со што ќе се олесни обработката на почвата, да воспостави рамнотежа помеѓу кореновиот систем и надземниот дел, да се отстранат болните ластари од разни заболувања и да се отстранат сувите и замрзнати делови.
Исто така со резидбата се остава саканиот број на окца на ластарот и вкупниот број на пенушката. За да се изврши резидбата квалитетно, пожелно е да ја извршуват додро обучени и искусни работници. Од голема важност е и тоа да се знае, дека родноста на сите окца по должината на ластарот не е еднаква. При основата на ластарот окцата се помалку родни, кон средината
родноста се зголемува и како се оди кон крајните окца, родноста се намалува.
Во лозовите насади на род, основната или зимска резидба се извршува во периодот на мирување на лозата или од опаѓањето на лисјата па се до пред самото потерување на окцата на пролет. Обично во наши услови, земјоделците со помала површина, резидбата ја извршуваат во втората половина на месец февруари, со цел да го избегнат солзењето на лозата, со кое се губат хранливи материи многу важни за развојот на младите ластари.
Кај нас, во зависност од развиеноста на пенушката, повеќето лозари ја извршуваат мешовитата резидба, односно на една пенушка оставаат по два лака со по шест до осум окца и два кондира CO по едно до две окца.
При резидбата пожелно е да се оставаат ластари за лакови со средна дебелина, односно дебелина на молив, бидејќи кај нив окцата се посигурни за потерување, а да се избегнуват подебелите ластари од причина што, кај нив дел од окцата не се добро формирани и созреани и се случува голем број да не потераат.
Пред да се пристапи кон резидба потребно е алатот добро да се дезинфецира во чист алкохол.
Откако ќе заврши со резидбата, се препорачува на стеблото и краковите да им се исчисти старата кора, бидејќи под неа се наоѓаат и презимуваат разни инсекти и болести кои се активираат штом настапат топлите денови, но, од непознати причини повеќето лозари не ја извршуваат оваа многу важна механичка мерка.
Како наредна активност која треба да се изврши во лозјето е врзување на ластарите оставени за лакови за првата жица од потпорната конструкција.
Зимско прскање на виновата лоза
Од голема важност е од кога се заврши со резидбата, да се пристапи кон зимска заштита на лозјата. Препорачливо е да се извршат две зимски третирања.
Првото превентивно, со препарати на база на бакар, за заштита од црна пегавост (phomopsis vitikola) и тоа во фаза на мирување на лозата и второто прскање се врши кога окцата се во фаза на набабрување, со маслени препарати. Прскањето се извршува при сончево, тивко и без ветер време и на позитивна температура.
Катерина Колева, АПРЗ
