Самитот, кој ќе се одржи под мотото „Градиме мостови и заеднички ја обликуваме иднината“ во хотелот DoubleTree by Hilton, се организира по повод 25-годишнината од основањето на АХК Северна Македонија и Македонско-германското стопанско здружение (DMWV).
Настанот ќе ги обедини клучните актери од политиката, економијата и институциите од двете земји, нудејќи платформа за унапредување на економската соработка, инвестициите и стратешките партнерства.
Германија е најголемиот трговски партнер на Северна Македонија, со речиси 50% од македонскиот извоз насочен кон германскиот пазар. Над 200 германски компании досега инвестирале во земјата, отворајќи околу 28.000 работни места во автомобилската индустрија, медицината, логистиката и ИТ-секторот.
Самитот ќе понуди богата програма, вклучувајќи свечено отворање од премиерот Христијан Мицкоски, обраќања од високи германски претставници, како и две панел-дискусии на теми поврзани со инвестициските предизвици и обезбедувањето квалификуван кадар.
Во рамки на самитот ќе се одржи и „Startup Innovation Stage“, каде младите македонски стартапи ќе имаат можност да ги презентираат своите идеи пред потенцијални инвеститори.
Првпат ќе биде доделена и наградата German-Macedonian Business Award 2025 за компании кои се истакнале со својот придонес во билатералната соработка, иновативноста и општествената одговорност.
Организаторите најавуваат дека самитот ќе стане редовна годишна средба, насочена кон градење одржливо економско партнерство меѓу двете земји.
