Околу 40 корисници на тезги во прилепскиот градски пазар денеска неколку часа го затворија зелениот пазар и протестираа против дивите продавачи. Револтирани се што проблемот се провлекува 10-тина години, а не се решава. Бараат итно да се реши, како што велат незаконската, дива продажба што е надвор од градскиот пазар. Според Николче Трајкоски, претседател на здружението „Пазари“, доколку за една недела не се реши проблемот ќе штрајкуваат.
-Продаваме во зелениот дел од пазарот и имааме закуп во текот на целиот дел од годината. Бараме од надлежните, согласно со законските прописи, веднаш да ги дислоцираат сите диви продавачи кои се во околината на на пазарот, па и во делови од градот на соодветно место, наменето за таков вид продажба, поранешен Кванташки пазар или на тезгите кои се во склоп на Пазарот каде има слободни тезги. Бараме правна заштита од ЈКП „Пазари“ по сите точки од договорот кои ни го издадоа, а го имаме потпишано. Сите сме легално пријавени во УЈП, си ги подмируваме сите давачки спрема државата и спрема претпријатието. Бараме од локалната и од инспекциските служби да го решат проблемот и овозможат соодветен простор. Вака се узирпирани паркинг просторите и пешачките зони. Доколку не се исполнат барањата ќе организираме штрајк и граѓанска непослушност. Со ова ни се преполовени приходите, а се грижиме за преку 200 членови на нашите семејства, изјави Трајкоски.
Во близината на градскиот пазар се продаваат земјоделски производи. Земјоделците кои се од струмичкото село Баница велат дека не го разбираат протестот на пазарџиите. Тие се, како што рекоа, регистрирани земјоделци, дозволено им е од ЈКП „пазари“ да продаваат и плаќаат закупнина.
Директорот на ЈКП „Пазари“ телефонски кратко рече дека упатил барање да се отстранат продавачите.
– Имам упатено барање до надлежните да се отстранат сите што продаваат надвор од пазарот, а и лично сум ги замолувал да заминат. Досега се немам сретнато со продавачите од зелениот пазар, рече Крстески.
Продавачите од пазарот што протестираа велат дека надлежните се запознати со нивните барања.
Прилепскиот пазар во чиј склоп е и зелениот, е на површина од околу 5 000 метри квадратни, препокриен е и има над 450 тезгиња. Се смета за еден од најголемите во пелагонискиот регион.
Извор: МИА
