Повеќе од 20.000 банкари и брокери во Шангај живеат во своите канцеларии за да можат непречено да работат поради строгите градски блокади предизвикани поради пандемијата.
Како што пишува Business Insider, некои канцеларии во финансиската област позната како кинески Вол Стрит, подготвиле предмети како што се вреќи за спиење и други потребни работи за вработените да „кампуваат“ таму во текот на ноќите.
За менаџерот Хенри да се живее во канцеларија значи да се дели тоалетот со 20 луѓе без пристап до туш. На некои од нив им се понудени дневници помеѓу 78 и 314 долари по ноќ за да спијат во канцелариите.
Шангај, финансискиот центар со 26 милиони жители, е поделен на два дела за да се овозможи масовно тестирање, а жителите од двете страни на реката поминуваат низ различни фази на строг карантин.
Ограничувањата и строгите мерки се продолжени уште 10 дена, што значи дека вработените во финансискиот кварт ќе мора да живеат во своите канцеларии и подолго од планираното.
За некои работници живеењето во канцеларија почнало и пред да биде воведен карантинот. На видеото кое минатата недела на социјалните мрежи го сподели интернет-порталот China Internet Information Centre се гледа дека вработени во канцеларии во Шангај спијат на душеци или во вреќи меѓу своите бироа, а еден од нив спие на два реда столови.
Човекот во видеото објаснува дека колегите кои ‘рчат спијат во салата за состаноци, додавајќи дека немало тушеви па морале да зовриваат вода за да се измијат.
