Мразот изминативе неколку денови направил големи штети во некои француски лозарски региони.
„Имам околу триесет хектари мерло кое веќе имаше повеќе од два раширени листови. Сè е замрзнато“, се пожали за Vitisphere Ерик Мејно, винар од Ландерруат, во југозападниот дел на земјата.
На само 20 километри посеверно, Винсент Жеро на социјалните мрежи сподели „изгорени“ пупки од винова лоза. Таму во саботата во текот на ноќта биле измерени -7 ° C .
„Сè изгоре“, напишал тој под две фотографии, а во коментарите на колегите од југоистокот се гледа дека не биле поштедени ниту тие.
Мразот во овој регион се појавил по многу благи температури во март поради што ластарите се развиле рано.
Следејќи ја прогнозата, некои одгледувачи запалиле свеќи, гасни турбини, па дури и слама во нивните насади. Оние што ги кроеле лозјата малку подоцна, би можеле да имаат помала штета.
Дел од лозарите се тешат дека имаат доволно сорти што созреваат подоцна.
„За неколку дена ќе сфатиме дека плантажите реагираат подобро од очекуваното“, оптимист е лозарот Беноа Готје, кој верува дека сепак нема да се повтори 2021 година, кога француската винска индустрија беше опустошена од најлошиот мраз во последните децении.
Минатогодишното производство на вино беше едно од најлошите во историјата.
Треба да се напомене дека во Шампањ, на североистокот на Франција, температурата била на рекордно ниско ниво од -9 ° C, што е последна таква температура забележана од април 1947 година. Сепак, таму вегетацијата се уште не беше интензивно започната, па лозјата беа поштедени.
Кога станува збор за другите култури, Ројтерс пишува дека најпогодени се одгледувачите на сливи, цреши, јаболка и круши, а некои би можеле да загубат најмалку 80 отсто од родот.
